Accessibility links

шимбә, 10 декабрь 2016, Казан вакыты 05:59

Semberdä tatar mäktäben räsmi räweştä tantanalı açuğa äzerlek bara


Bu cähättän “Ömet” gäziteneñ soñğı sanı tulayım diärlek alda torğan şuşı waqiğağa bağışlanğan.

Berençe säxifäneñ iñ başında Ölkä başlığı Sergey Morozovnıñ “4-üktäberdä – tatar mäktäbeneñ tantanalı açıluı” iseme astında birelgän täbriknamäse. Annan ber özek ayıruça iğtibarğa layıqtır: “Üz teleñne, mädäniätıñnı, tarixıñnı, ğöref-ğadätläreñne saqlaw här xalıq wäkileneñ izge burıçı. Töbäk xakimiäte isä yaqtaşlarğa şuşı yünäleştäge eşçänlektä, etnomädäni tärbiä häm belem aluda yärdäm itärgä tieş”

Berençe säxifädäge ikençe yazma “Tatar mäktäbe zur qunaqlarnı kötä” dip atala. Anda gubernator, şähär merı, Qazannan Räis Şäyxelislamov, Rinat Zakirov, mäğärif eşçänlegendä qatnaşqan şirqat''lär häm firmalar citäkçeläre, tatar maltabarları, milli xäräkät citäkçeläre çaqırılğanı bäyän itelä.

2-nçe säxifädä Tatar, Çuaş, Muqşı avtonomiäläre citäkçeläre Ramis Safin, Vladimir Svaev, Antonina Miganova, Tatarstannıñ Mäğärif häm fän ministrı Räis Şäyxelislamov, Bötendönya Tatar kongressı räise Rinat Zakirov täbrikläre. Alarnı cirle şağirlärebez İdelbikä, Rifqat Xismät, Väli Hadiullinnarnıñ şiğri yulları tulılandıra. İdelbikädän ber özek tä täqdim itäbez:

Tel, dip can birergä äzer cannar –

Uqıtuçı, millätpärvärlär.

Tik üzläre şahit – küpme kirtä

Ütkän bu mäktäpkä yıl-yullar.

İñ zur baylıq - minem balaçaqta

Üz telemdä alğan belemem.

Şul cide yıl iltte şiğriätkä,

Sınıy-sınıy üsmer tüzemen.

Kiler ber kön, dair-dairälär,

Sez buldırğan mäktäp türendä.

İgelegegezgä yäşüsmerlär

Räxmät uqır ana telendä.

4-nçe säxifäne mäktäp direktorı Älfiä Abutdinovanıñ “Töp maqsatıbız – ata-analarnıñ ışanıçın aqlaw” digän yazması häm “Tuğan tel”, “Mädäniät”, “Aq qalfaq” oyışmalarınıñ täbrikläre bili.

5-nçe säxifä balalar fikerlärenä birelgän. Barısı da şuşı mäktäpkä uqırğa kerülärenä şatlanuların belderälär häm bu mäktäpneñ östenleklären assızıqlıylar. Baytağı ana telen häm ğäräp ilyasın öyränü mömkinleklärenä şatlıq belderä. Mäktäpneñ başqa östenleklärennän menä närsälär yış qabatlana: komp''yutor beleme alu, milli köräş tügäräge, mäktäptä milli möxit tudırıluı, tänäfeslärdä şaw-şu, çabış-törtkäläşlärneñ bulmawı, uqu bülmäläreneñ yaxşı äzerlänüe, tatar tarixın, mädäniäten, yolaların öyränü mömkinlege, Qazanda belem alu ömete, uquçılar häm möğallimnär arasında cılı mönäsäbätlär, çın tatar tärbiäse alu...

Säxifädä şulay uq mäktäpkä berençe ğariza tapşırğan Zilä Möxämmätşinanıñ fotosüräte, anıñ äbise Zöhrä Xäbibullinanıñ balaların häm onıqların tärbiäläw täcribäsenä dä urın birelgän. Ziläneñ 5 yäşlek señlese Räzinä dä apası yulına äzerlänä ikän. Ul saf ana telendä aralaşa, cır-şiğırlär belän törle çaralarda qatnaşa da inde.

“Ömet”neñ tağın ber säxifäse şuşı mäktäpkä bağışlanğan. “Alar –berençelär!” iseme astında barlıq uquçılarnıñ da isemlege birelgän. Alar arasındağı 10 uquçınıñ isem-familiäläre urısça yañğırıy. Küpçelege – qatnaş nikax balaları ikän. Ämma urıs, çuaş, muqşı wäkilläre dä bar. Şulay uq igezäk äzeri balaları Yusifli Aynur häm Wyusal, häm üzbäk yegete İrkenbaev Urmat şuşı mäktäpne saylağannar. Döresräge, äti-äniläre saylağandır inde

Axırda mäktäpne uqu yılına äzerläwdä matdi yärdäm kürsätkännär isemlege. Älbättä inde, başta ölkä xakimiäte, şähär meriäse, Tatarstan Xökümäte häm Bötendönya Tatar kongressı atala. Artaban 43 sponsor isemlege.

Ayrat İbrahim, Sember

XS
SM
MD
LG