Accessibility links

җомга, 9 декабрь 2016, Казан вакыты 05:05

Çallıda xezmät xaqın kütärälär


Çallıda eşläwçe xalıqnıñ xezmät xaqları az buluı şähär citäkçelären berqädär borçuğa saldı. Çönki, xezmät xaqı küläme demografik wazğiätkä, xalıqnıñ tormış-könküreşenä, sälämätlegenä, belem aluına da tä'sir yasıy. Menä şuşı küreneşne küz aldında totıp, Çallı xakimiäte yaña başlanğıç belän çıqtı. Bu initsiativa şunı añlata, citeşterü ölkäsendä eşläwçelärneñ xezmät xaqları 5900 sumnan az bulırğa tieş tügel. Uzğan atnada xakimiät tarafınnan "Härber Çallı predpriätiese xezmätkärenä minimal' qullanu byudjetınnan kim bulmağan xezmät xaqı" digän isem astında aylıq iğlan itelde. Şuşı aylıq barışında xezmät xaqı 5900 sumnan az bulğan predpriätie citäkçeläre başqarma komitetqa çaqıru alalar häm anda alğa kileşü täqdim itelä. Kileşü dokumentları şunnan ğibärät, eş birüçelär tiz arada üzlärendä eşläwçelärneñ xezmät xaqın alda äytelgän 5900 sumğa citkerügä rizalıq birergä tieşlär. Şähär citäkçeläre fikerençä, bik küp predpriätielärdä xezmät xaqı ber keşegä 2-3 meñ sum külämendä tülängän itep kürsätelä. Ä çınbarlıqta zur xezmät xaqı konvertlarğa salıp birelgän aqçalar belän isäplänä häm bu aqçanıñ küläme bik az keşegä genä mäğlüm. Käğäzgä törep birelgän aqçalar salımnarı da bireşmilär.

Eşmäkärlär xakimiät başlanğıçın niçek qabul itälär? Üzeneñ isemen kürsätmäwne sorağan ber eşmäkär "Azatlıq" xäbärçesenä bolay digän ide:

-"Mindä 70тән artıq keşe eşli. Zur küpçelege 3мең sum xezmät xaqı ala. Tieşle salımnarın tülibez. Xezmät xaqın 5900 sumğa kütärü mömkinlege yuq. Eşçelärneñ xezmät xaqın kütärergä rizalıq birsäm, minem predpriätiemne bankrotlıq kötä. Belüemçä, küpçelek uqıtuçılarnıñ, tabiplarnıñ da xezmät xaqları bezdägedän yuğarı tügel."

Çınnan da, isemen kürsätmäwne telägän älege eşmäkär dä, tağın qayberläre, näq menä byudjetta eşläwçelärneñ dä xezmät xaqları az buluına işarä yasıylar. Bu inde, başta üz xezmätkärläregez turında qayğırtığız, annarı beznekelär xaqında- iyüllärme, äytü qıyın.

Düşämbe könne xakimiättä uzğan xucalıq citäkçeläre cıyılışında şähär merı İldar Xalikov minimal' xezmät xaqın 5900 sumğa kütärü çaralarınıñ barışına da tuqtaldı. Keşe tieşençä tuqlanırğa häm yäşärgä tieş. Konvert sistemasın beterü- moña etärgeç biräçäk, didu ul.

Xalikov dönya yuğarılığına da kütärelde: Berläşkän Millätlär Oyışmasınıñ keşe xoquqları turındağı Konvensiäsendä bolay dielä ikän- eşläwçegä säğätenä 2 dollardan kim tülänä ikän, bu inde keşene izü, eksplutatsiäläü bula. İldar Xalikov, keçkenä xezmät xaqı, konvert belän aqça birü mäs’äläseneñ bik citdi buluın iskärtte häm yaqın arada Çallıda respublika komissiäse eşläyäçägen belderde. Ägär, konvert belän xezmät xaqı birü oçraqları belensä, andıylarğa naçar bulaçağın iskärtte.

Ğafiulla Ğaziz, Çallı

XS
SM
MD
LG