Accessibility links

җомга, 9 декабрь 2016, Казан вакыты 20:27

Açıq mikrofon: Tatar yäşläre uyın biznesına nindi mönäsäbättä?


Tatarstanda uyın biznesı wäkilläreneñ respublika xökümäte belän qarşı toruı däwam itä. Bilgele bulğança, Däwlät Şurası qabul itkän respublika qararı nigezendä 17 oktäberdän başlap böten uyın şirkätläre Tatarstannıñ barı tik ike urınında ğına – Qazannıñ at sport kompleksında häm Kama Alanında tuplanırğa tieş. Şuşı kön yaqınlaşqan sayın, älege tarmaqta eşläwçe eşquarlar şaqtıy aqça kiterä torğan üzläreneñ urınnarı öçen köräşne arttıra. Älege köräşkä yärdämgä alar Mäskäwneñ keşe xoquqların yaqlawçı byuro wäkillären dä cälep itkännär. Byuronıñ yuristları şuşı könnärdä genä Qazanğa kilep, respublika qararınıñ ni däräcädä federal’ qanunnarğa turı kilüen tikşerä. Şulay uq, uyın biznesı wäkilläre tatarstan qanunı tormışqa aşırılsa, anı Rusiäneñ Yuğarı mäxkämäsendä däğwälarğa cıyına. Yuğarı mäxkämädä respublikada tormışqa aşırıla torğan qanunnı ni kötä? Älege sorawğa tögäl cawapnı belüçe yuq. Şuña da, respublika deputatları uyın biznesına taşlamalar birüne dä tıydı Tatarstan xökümätenä. Qararnı ütämäs öçen köräştä bar ısullarnı da qullanırğa tırışalar eşmäkärlär. Şularnıñ tağın berse – şähär üzägendä piketlar oyıştıru. Distälägän keşelär qarşılıq aksiäsenä çığıp, üzläreneñ uyın biznesı tarmağında eşlärgä xoquqın dawlıy başladı. Xäyer, çınbarlıqta piketta eşläwçelär, eşmäkärlär üzläre genä qatnaşmıy, keşe sanın artıru öçen alar studentlarğa aqça birep, çarağa alarnı çığarğan, digän mäğlümätlär dä buldı. Ä tatar yäşläre, studentlar uyın biznesına nindi mönäsäbättä tora? Bügenge Açıq mikrofon säxifäseneñ soraştıruı şuşı xaqta.

Anıñ ber dä kiräge yuq. Uyın avtomatlarında aqça betä, bay keşelär xäyerçelänä.

Uyın avtomatlarınıñ cämğiätkä bik zur zıyan kiterä. Häm anıñ kiräge yuq.

Menä minem duslarğa 18 yäş tulmağan, läkin şuña qaramastan alar uyın avtomatlarında uynıylar. Ä qanun buyınça alar anda uynarğa tieş tügel. Yäşlärne uyın avtomatlarınnan yırağraq totarğa kiräk.

Älbättä uyın avtomatları yaxşı küreneş tügel, tik bu xäzerge cämğiätneñ mäcbüri sıyfatı häm annan qotılıp bulmıy. Xäzerge qabul itelgän qanun buyınça yustitsiä ministrlığı qayber keşelärgä bu eş öçen litsenziä birä, dimäk alar bu eş öçen tulı xoquqqa iä. Ägär dä inde keşedä u eş öçen xoquqları bar ikän, alar anıñ belän şöğellänä ala. Yörise kilgän keşe yörsen häm uynasın.

Uyın avtomatları öçen qayberäwlär üz ğömerlärenä qul sala. Min qarşı alarğa.

Bu uyın avtomatların beterü bik küp problemalar kiterergä mömkin. Çönki küp kenä keşelärneñ biznesı şul uyın avtomatları belän bäylängän. Häm bu älege eşmäkärlärgä oşamıy. Bu problema tiz genä xäl itelmäyäçäk.

Minemçä, monı beterergä kiräk tügel. Ä keşelärgä nıq zıyan salmıy torğan itep, äytik, keşelärgä bu dönyadan arğan çaqlarında kerep uynap çığarğa dip qaldırsalar yarıy. Anı küñel açu itep kenä qaldırırğa, ä bayu, aqça eşläw räweşendä qaldırmasqa ide.

Uyın avtomatları bigräk tä yäşlärgä bik kire yoğıntı yasıy, alarnı boza.

Gölnaz Şäyxetdin

XS
SM
MD
LG