Accessibility links

Кайнар хәбәр

Peterburda pravoslav dine däreslärenä qaraş


Peterburg mäktäplärgä pravoslav mädäniäte mäcbüri kertelgän töbäklär rätenä kermi anısı, ämma ildä bu mäs'älä tiräsendä barğan wazğiät'qa bezdä dä bitaraf tügellär. Qaysıber mäktäplärneñ xätta berqädär täcribäse dä bar: eksperimental' räweştä bu fän bezdä inde kertep qaralğan ide.

.Ä menä şähär xakimiäteneñ mäğärif bülege belgeçe Larisa Quzmina fikerençä bügen Peterburg mäktäplärendä pravoslav mädäniäte nigezlären kertü döres bulmas ide , alay ğına da tügel, bu berqädär qurqınıç ta. Çönki bezneñ ilebez küpmillätle, küp konfessiäle häm çirkäw däwlättän ayırılğan. Pravoslav dinen kertü küplärneñ milli- dini xislärennän kölü kebek bulır ide. Larisa Quzmina:"Şuña kürä bezdä ul däreslär bulmayaçaq",- disä dä, .qayber mäktäplärdä ata-analar rizalığı belän pravoslav nigezläre bügen dä uqıtıla. Mäsälän, 345 mäktäptä. Anıñ direktorı Anatoliy Lazarev: "Bez yuqqa çıqqan oktäberyat, pioner, komsomol oyışmaların 6 yıl elek ük şuşı däreslär belän alıştırdıq. Bu däreslär tärbiäwi rol' ütilär. Alardan fayda ğına ", - di.

Ä 550 mäktäp direktorı Boris Notkin uyınça pravoslav dinen uqıtu tamırdan döres tügel. Rusiädäge barlıq töp dinnär nigezen öyränü döresräk bulır ide. "Bezneñ mäktäpneñ 90 protsentın yähüd balaları täşkil itä, şunlıqtan bez programmağa yähüd ğöref- ğädätläre däresen kerttek. Ämma bu balalarğa iudaizmnı köçläp tağu tügel, uqıtuçılar da din ähellärennän tügel, ä maxsus äzerlek ütkän Rusiä häm İzrail' pedagogları. Ul şulay bulırğa tieş tä ", - di.

Qanunnar cıyılışı deputatı Mixail Amosovqa " Pravoslav mädäniätı nigezläre" fäne belän köräşergä dä turı kilgän. Anıñ qızı Ğaliä uqığan Vaganova isemendäge mäşhür xoreografiä uçilişçesında da berniçä yıl elek bulğan andıy fän. Däreslär fakul'tativ bulıp sanalsa da, alarğa yörü mäcbüri bulğan. Ata- analar moña qarşı çıqqan. "Balalarnı ul däreslärdän azat itü öçen bezgä bik küp köç quyarğa turı kilde ", -di Mixail Amosov. "Andıy däreslär telägän keşelär öçen genä, çirkäwdä uzarğa tieş. Ägär mondıy däreslär mäktäptä ütkärelä ikän, islam, lyuteran, buddizm nigezläre dä uqıtılırğa xaqlı",- dip sanıy Mixail Amosov.

Peterburgta yäşäwçe millättäşlärebezneñ dä bu turıda üz fikerläre bar.. Mäsgudä xanım :"Pravoslavmı, islam nigezlärenme öyränü- keşeneñ üzennän tora.Öyränergä telägän keşegä xäzer kitaplar da citärlek. Din nigezlären mäktäptä uqıtunıñ kiräge yuq. Minem balam uqığan mäktäptä bu fän kertelsä, min balamnı anda cibärmäs idem. Attestatta ul fännän bilge tormas bulsa da",-digän fikerdä.Gersen isemendäge pedagogiä universitetı uqıtuçısı uyınça bu fänne maxsus äzerlege bulğan keşelär uqıtırğa tieş.Anna küpmillätle, küp konfessiäle ildä ber dinne dä cäberlärgä tieş tügellär.

Räşidä xanımnıñ bu problemağa qaraşı şaqtıy kisken, çönki qızı Ümidä mäktäptä "prodlenkağa" yörgändä bu fänne mäcbüri uqıtırğa tırışıp qarağannar, ana da, bala da qarşılıq kürsätkäç , tuqtağannar. "Prezident Putin rusiälılarnıñ 20 protsentı möselmannar digän ide. Möselman balasınıñ üz ata-babaları dinen öyränergä xoquqı bar. Ägär çit dinne mäcbüri öyrätälär ikän, Saray mäydananına uram cıyınına çığarğa kiräk".

Gölzadä Kamalova, Sankt- Peterburg

XS
SM
MD
LG