Accessibility links

җомга, 9 декабрь 2016, Казан вакыты 10:45

Sacidä Söläymanova tuuğa 80 yıl


Sacidä Söläymanovanıñ iseme küplärgä tanış. Anı tatar Axmatovası dip tä yörtälär. Sacidä Söläymanovanıñ şiğerlären rus häm başqa tellärgä dä tärcemä itälär.

Şağiräneñ tuğan yağı - Başqortstannıñ Yañawıl rayonı. Şunda pedagogika institutın tämamlap, Sacidä apa 1955 yılda Tatarstanğa kilä. Häm ozaq yıllar däwamında Älmät şähärendä yäşi. Älmättä Sacidä Söläymanova neft' texnikumında uqıta. Şunda icat ta itä başlıy. Anıñ tuğan yağına, anıñ keşelärenä mäxäbbät xise belän suğarılğan berençe şiğerläre dönya kürä. Monnan soñ Sacidä apanıñ distädän artıq şiğer cıyentıkları basıla. Anıñ “Sabır qanatları” digän şiğer cıyıntığı, “Qırğı miläş” poveste häm başqalar da xalıq küñelenä bik yaqın bula.

Şağir Äxmät Räşit Sacidä apanı bik küptännän belgän keşe. Ul üzeneñ istälekläre belän urtaqlaştı:

Ul waqıtta äle isän bulğan Xäsän Tufan, Sibgät Xäkimnär dä Sacidä Söläymanovanıñ xalıq arasında şul qädär populyar buluına ğäcäplängännär ide. Yuğisä ul üze ällä närsä turında yazmağan da kebek. Ğadi keşe tormışın çağıldırdı. Menä ber şiğerennän özek:

Üskän çaqta tormış nazlamadı

Bizämäde qulı baldaqlar

Baldaq-baldaq bulıp sızılıp qaldı

Uraq kiskä ezlär barmaqta…

Äxmät Räşit äytüençä, Sacidä Söläymanova Tuqay premiäsenä layıqlı şağirä ide. Ämma aña ul tapşırılmağan. Xalıq yaratsa da, isän çağında şağirä başqa büläklärdän dä, ğomumän tieşle iğtibardan çittä qalğan. Şulay da anı onıtmıylar. Äxmät Räşit däwam itä:

İñ xikmätlese şul - äle ul üze ülgäç tä, anı äledän äle iskä alalar. Däräcäle büläklär alğan şağirlär bar, ämma alar onıtılğan, ä Sacidä apa yuq. Sişämbe könne Qazannan ber törkem yazuçılar Älmät şähärenä kitte. Bu könne Älmät şähärendä şağirlärgä, yazuçılarğa Sacidä Söläymanova isemendäge premiäne tapşıru tantanası ütte. Bigräk tä yäş qäläm iäläre öçen Sacidä Söläymanova ul üzenä kürä ber ostaz, ostalıq mäktäbe dip äyter idem. Annan bik küp närsägä öyränergä bula.

Al'bina Zäynulla

XS
SM
MD
LG