Accessibility links

сишәмбе, 6 декабрь 2016, Казан вакыты 11:23

BMOnıñ yaña general sekretare Könyaq Korea tışqı eşlär ministrı Pan Gi-Mun bulır dip kötelä


Yıl axırında Berläşkän Millätlär Oyışması general sekretare Kofi Annan wazıyfasınnan kitä. Anıñ urınına Könyaq Korea tışqı eşlär ministrı Pan Gi-mun kiläçägenä inde bernindi şik yuq diärgä mömkin. Düşämbe könne BMO İminlek Şurasında ütkärelgän soñğı formal bulmağan tawış birüdä şuradağı 15 äğzanıñ 14-e, şul isäptän veto xoquqına iä barlıq äğzalar da Pannı yaqlawların belderde. 9-nçı üktäberdä isä yaña citäkçe saylawnıñ kiläse, ä bälki soñğı adımı, formal tawış birü bulaçaq.

BMO nizamnamäse nigezendä general sekretar urınına namzätne Ğömümi Cıyınğa İminlek Şurası täqdim itä. Ğömümi Cıyın isä ğadi küpçelek belän anı raslıy yäki kire qağa. BMOnıñ 61 yıllıq tarixında Şura täqdim itkän barlıq namzätlär dä Ğömümi Cıyında xuplana kilde.

Oyışmanı 1996 yıldan birle citäklägän Gana wäkile Kofi Annan yıl axırında wazıyfasınnan kitäçäk. İminlek Şurası küçeş çorına kübräk waqıt birü öçen yaña citäkçene üktäberdä saylarğa buldı.

Düşämbe tawış birüdän soñ BMOdağı Qıtay ilçese Wañ Guanya "Bügenge tawış birüdän İminlek Şurasınıñ Ğömümi Cıyınğa ministr Pan Gi-Munnı täqdim itäçäge şaqtıy açıq kürenä" dide.

Ütkäber ayında Şuranı citäkläwçe Yaponiä ilçese Kenzo Oşima qabat formal bulmağan tawış birülär ütkärelmiäçäk dide.

"Minemçä, bügenge tawış birüdän soñ Şura üzen formal tawış birügä äzer dip xis itä" dide Oşima.

Qalğan 2 namzät BMO general sekretare urınbasarı, Hindstan wäkile Şaşi Tarur belän Latvia prezidentı Vaira Vike-Freiberga elegräk ütkän tawış birülärdä beraz yaqlaw tapqan bulsa da, düşämbe könge tawış birüdän soñ ömetlären tämam yuğalttılar.

Ul tawış birüdän soñ Tarur üz namzäten kire aldı, häm kiläse citäkçeneñ Pan Gi-mun bulaçağı inde açıq dide.

7 nazmät qatnaşında başlanğan bu bäygedä 62 yäşlek Pan Gi-mun iñ baştan uq berençe bula kilde.

Anı Qıtay, Britaniä häm Quşma Ştatlar nıq yaqlap kilde.

BMOdağı AQŞ ilçese John Bolton "Bez tışqı eşlär ministrı Pannı bik nıq xörmät itäbez. Bez anı Waşingtondağı häm New Yortkarğı eşçänlegennän yaxşı beläbez. Min anı diplomat bularaq ta, kebe bularaq ta bik yuğarı bäyälim" dide.

Formal tawış birüdä İminlek Şurası äğzaları üz fikerlären üzgärtä dä ala. Ämma namzätneñ tizräk saylanırğa tieşlegen, häm kiläçäk general sekretar Aziädän bulırğa tieş digän urtaq fikergä kilüne isäpkä alğanda, kiläse atnada Pan Gi-Mun çınnan da Ğömümi mäcleskä täqdim iteler dip kötelä.

Naif Aqmal, Praga.
XS
SM
MD
LG