Accessibility links

Кайнар хәбәр

Rusiä xärbiläre azat itelügä qaramastan, Mäskäw Gruziägä çikläwlär kertte


Düşämbedä Gruziä räsmiläre küzläwdä ğäyeplängän Rusiä ofitserların azat itügä qaramastan, räsmi Mäskäw bu ilgä çikläwlär kertte. Gruziä belän här törle transport bäyläneşe, poçta elemtäse tuqtatıldı.

Yewropada İminlek wä Xezmättäşlek Oyışmasına tapşırılğannan soñ düşämbe kiç Mäskäwgä qaytıp töşkän ofitserlarnı Saqlanu ministrı Sergei İvanov qaharmannar kebek qarşıladı:

"Gruziä çitlegennän tuğan tufraqqa qaytuığız belän qotlıym. Rusiä ofitserlarına xas tüzemlek kürsätkänegez öçen räxmät. İxtimal, bu Gruziädän bu yılda soñğı oçqıç bulır" di Rusiäneñ Saqlanu ministrı .

İvanovnıñ bu yanawı ni däräcädä dörester, ämmä uzğan tönnän başlap Rusiä belän Gruziä arasında hawa bäyläneşe özelde. Aeorflot räsmiläre äytüenä qarağanda, Üktäber axırına qädär. Monnan tış, Gruziä belän Rusiä arasında timer yul, maşina, su ylları yabıldı, poçta elemtäse tuqtatıldı. Monı Gruziä yağı da rasladı:

"Bez här törle cir öste, häm yök, häm yulçılar transportına çikläwlär kertelü turında räsmi kisätü aldıq. Şuña basım yasıysım kilä: bu ike yaqlı kileşülärne bozu bulıp tora, anda beryaqlı adımnar qaralmağan" di Gruziäneñ Tışqı eşlär ministrı urınbasarı Nikolaz Natbiladze.

Natbiladze süzlärençä, Rusiä oçqıçları Gruziägä oçmasa da, Gruziä kükläre alar öçen açıq bulıp qala.

Transport çikläwlärennän tış Mäskäw tağın Rusiädän Gruziägä aqça küçerülärne tuqtatırğa äzerlänä. Ofitserlar azat itelügä qaramastan, Duma bu mäsäläse barıber tikşeräçäk, dide sişämbedä Duma räise Boris Grızlov.

Bu çikläw Rusiädä qazanğan aqçaların Gruziädäge tuğannarına cibärep yatqan gruzinnarğa awırlıqlar tudıra ala. Rusiädä million-yarım çaması gruzin bar dip sanala. Şularnıñ ni barı 10 meñ çaması räsmi terkälgän.

Cibärelgän aqçanıñ külämenä kilgändä, ike ilneñ räsmiläre äytkän sannar şaqtıy ayırıla. Rusiä räsmiläre äytüençä, gruzinnar yılına 2 milliard dollar çaması aqça küçerä, bu keremnärdän Rusiä qaznasına ber tiem salım da kermi.

Gruziä räsmiläre isä bu san küpertelgän di. Gruziäneñ milli bankı belderüençä, şuşı yılnıñ berençe 8 ayında gruzinnar üz ilenä 219 million dollar cibärgän.

Rusiädä qanunsız eşlägän gruzinnarğa xäzer ildän quılu yanıy. Düşämbedä Rusiäneñ Migratsiä xezmäte Mäskäwdä 13 şundıy gruzinnı inde totqarlağan.

Rusiäneñ bu çikläwläre küpmegä barır, äytüe qıyın. Döres, alar berençese tügel. Şuşı yılnıñ yazında Mäskäw Gruziädän şäräp, mineral su, ciläk-cimeşlär kertüne tıyğan ide. Mäskäw monı tawarlarnıñ naçar sıyfatı belän añlattı, Tiflis – säyäsi uyın dip.

Rusiä-Gruziä mönäsäbätläre 2003 yılda xakimiätkä Mixail Saakaşvili kilgäç bozıldı. Tiflis Mäskäwne Abxaziä häm Könyaq Osetiä separatisların yaqlawda ğäyepli. Tiflisnıñ NATOğa kerü niätläre Mäskäwneñ açıun çığara.

Sişämbedä Gruziä parlamentı räise Nino Burjanadze Gruziä çikläwlärgä qarşı toraçaq dip belderde.

"Gruziä bu blokadağa älbättä qarşı toraçaq. Läkin sivilizatsiäle illär ber-berse belän bolay söyläşergä tieş tügel" di Gruziä parlamentı räise.

Mäskäw belän Tiflis arasındağı bu qarşılıq ni belän beter, älegä äytüe qyın. Älegä här taraf üzenekendä tora.

Ali Ğilmi
XS
SM
MD
LG