Omskida eşläp kilüçe ictimaği oyışmalar comğa könne mer Viktor Şreyder belän oçraştılar. Anda 2006-nçı yılda şähär xakimiäte tarafınnan ütkärelgän grantlar konkursında ciñep çığuçılar çaqırılğan idelär. Şähär başlığı alarnı grantlar otu belän täbrikläp: “...xezmätegez öçen, yärdämgä moxtaclarğa yärdäm kürsätüegez öçen, ğomumän, Omski şähärenä yärdäm kürsätüegez, cämäğätçelek eşlärendä qatnaşuığız öçen räxmät”,-dide.
Şulay uq üzeneñ çığışında Viktor Şreyder: “Grantlar programmaların tikşerüçe komissiä bügenge köndä aktual' mäsälägä – sotsial' yünäleştä eşlängän proyektlarğa töp iğtibarın yünältte. İñ elek bez sezneñ belän bergäläp, üsep kilüçe yäş buınnı tärbiäläw problemaların, ğomumşähär mäsälälären xäl itäbez. Veterannar belän eşläw, ekologiä temaları da zur ähämiätkä iä”,-dip assızıqladı.
Oçraşunıñ axırında şähär başlığı grantlar otqan oyışmalar citäkçelärenä sertifikatlar tapşırdı. Xakimiät grantına layıq bulğan küptörle ictimaği oyışmalar arasında şähär tatar milli-mädäni möxtäriäte dä buldı.
Äytergä kiräk, grantqa layıq bulğan 29 programma arasında milli mädäniätlär üseşe temasına öç kenä proyekt buldı. Alarnıñ berse, şähär tatar möxtäriäte räise Ğafiä Aleeva citäkçelegendä eşlängän proyekt, “Balalar häm yäşlär belän eşläw” nominatsiäse buyınça yazılğan. Ğafiä xanım süzlärençä, “Xalqım çişmäläre” dip atalğan bu programma 70 meñ rubl'gä isäplängän bulğan.Ämma anıñ 30 meñe genä birelgän. Programma buyınça fol'klor cırlar cıyıntığı çığaru qaralğan. Grant proyektın mömkin bulğança ğämälgä aşıru buyınça eşne üktäber ayında uq başlayaçaqbız, di Ğafiä Aleeva.
Ägär beraz tarixqa äylänep qaytsaq, Omski şähärendä qayber milli oyışmalar qayçandır mädäniät idäräse strukturasında bulıp, berniqädär finanslanıp ta toralar ide. Ämma 90-nçı yıllar urtasında bu tärtip üzgärtelde, milli oyışmalar ictimaği bularaq xakimiät strukturasında bula almıylar dip tabıldı häm “ictimaği” bulıp räsmi terkäldelär.Annan soñ küp sular aqtı, 10 yıl elek milli-mädäni möxtäriätlär turında Rusiä qanunı qabul itelde, yaña milli oyışmalar, möxtäriätlär barlıqqa kilde. Bügenge köndä milli-mädäni möxtäriätlär dä, mädäniät üzäkläre dä üz könnären üzläre kürä - kemnär iğänäçe taba, kemnär aqçasız bulsa da nindider eşlär başqarırğa tırışa, kem grantlar yaza. Älege konkursta täqdim itelgän 60 proyektnıñ 29-ı ğına uñışqa ireşüen iskä alsaq, finanslawnıñ bu törenä zur ömetlär bağlap bulmıy. Şulay da ömet tä yuq tügel. Sertifiqatlar tapşıru barışında şähär başlığı Viktor Şreyder aldağı yılda grantlar öçen bireläçäk summanı ikelätä arttırırğa wäğdä birde
Ä şähär xakimiäteneñ milli häm dini oyışmalar belän eşläwçe bülege mödire Yevgeniy Lobunes, grantlar otqan oyışmalar citäkçelärenä möräcäğät itep, milli oyışmalarğa grant aşa yärdäm kürsätüne yıldan yıl arttıraçaqbız dide.
Milli häm dini oyışmalar belän eşläwçe bu bülekneñ xezmätkäre Şamil Kajbullin, anda küp söylämilär, küp eşlilär, alarda konsertlar, şähärdä härdaim çaralar, xäyriä çaraları, ölkä külämendä yörü, bu inde milli üzañnı, mädäniätne üsterügä zur öleş kertü dip, tatar möxtäriäteneñ eşçänlegen ayırım bilgeläp ütte.
Sişämbe könne Viktor Şreyder milli-mädäni oyışmalar citäkçelären ayırım qabul itte. Şähär başlığı alarnıñ Omskinıñ 290 yıllığın bäyräm itüdä kertkän öleşlären bilgeläde, hämmäsenä çäçäk bäyläme belän räxmät xatı tapşırdı.
Rozaliä Sayganova, Omski
