Accessibility links

дүшәмбе, 5 декабрь 2016, Казан вакыты 11:33

Çallıda - federal ministr


Çärşämbe könne Çallığa Rusiäneñ sänäğät häm energetika ministrı Viktor Xristenko kilde. Xristenko ministr bulu belän bergä KamAZ aksionerlıq cämğiäteneñ direktorlar şurası räise wazıyfaların da başqara. Federal ministr Tatarstan premyer ministrı Röstäm Minnexanov, KamAZ generalı Sergey Kogogin häm alarnı ozatıp yörüçelär belän bergä KamAZnıñ üzençälekle predpriätielärendä buldı. Üzençälekle digäne şul, bu berläşmälär qayber çit illär, bügenge oçraqnı alğanda, Almaniä belän urtaq şirkät tözegän "Qama" predpriätiese. "Qama" predpriätiese 2005 nçe yılnıñ noyäberendä açılıp, almannar yärdäme belän KamAZ öçen sıyfatlı tapşırular tartması cıya. "Severstal' Avto" kompaniäse elekke "OQA" avtomobil'läre zavodında tulı qüätenä çit il maşinaları yasıy başladı. Şuşı uñaydan Qızıl tasma kisü tantanası da buldı. Rusiäneñ sänäğät häm energetika ministrı Xristenko programma buyınça tağın berniçä şirkättä bulırğa tieş ide. Läkin ul, alar belän tanışıp tormadı, töşke aştan soñ Tübän Qama şähärenä kitep bardı. Jurnalistlar Xristenkonıñ kilüen kötkännär ide. Qızğanıç, ministrnıñ säfär çaralarına cirle jurnalistlar kertelmäde. Älege waqiğanı yaqtırtırğa teläk beldergän jurnalistlarğa ber säbäpsez-YUQ- dip äytelde. Şulay da, räsmi bulmağan qayber mäglümätlär buyınça, Xristenkonıñ KamAZğa kilüe barı tik säyäsi aksiä. Monda töp maqsat- Rusiä xökümäte tarafınnan KamAZğa bulğan iğtibarnı kürsätü. Çınnan da soñğı yartı yılda KamAZğa Mäskäwdän zur türälär bik küp kilde. Alar arasında "Yedinaya Rossiä" wäkilläre dä buldı. Tağın ber iğtibarğa layıq wäzğıät- Viktor Xristenkonıñ säfäre uñayınnan KamAZ matbuğat üzäge ministrnıñ Sergey Kogogin belän maxsus oçraşuına basım yasadı. Oçraşu buldımı, ni xaqında, älegä bilgesez. Tağın şul mäğlüm buldı- Viktor Xristenko KamAZ aksionerlar cämğiäteneñ direktorlar Şurası räise bulsa da, soñğı 2 yılda aksionerlarnıñ yıllıq cıyılışlarında qatnaşmağan.

Ğafiulla Ğaziz, Çallı

XS
SM
MD
LG