Accessibility links

Кайнар хәбәр

Pulkovo hawa kompaniäse Yewropanıñ "qara isemlegenä" kertelergä mömkin


Rusiäneñ hawa yullarındağı iminlek mäsäläse çärşämbedä Mäskäwdä ütkän xökümät utırışında tikşerelde. Rusiäneñ oçular belän idarä itü sisteması iskergän, anı yañartırğa kiräk dielde. Ul arada Yewropa Berlege Rusiäneñ Pulkovo hawa kompaniäsen "qara isemlekkä" kertü mäsäläsen tikşerä. Berniçä atna elek bu kompaniäneñ oçqıçı Ukraina kügendä qazağa oçrap, andağı bar yulçılar häläk bulğan ide. Qara isemlekkä kertelgän xäldä Pulkovo oçqıçlarına Yewropa kügenä kerü tıyılğan bulaçaq.

Şuşı qarar qabul itelsä, sırtına Pulkovo dip yazılğan oçqıçlar Yewropa kügennän yuqqa çığaçaq. Berlekneñ "qara isemlegendä" andıy tıyılğan şirkätlär inde 90nnan artıq. Moña qädär anda Rusiä kompaniäse yuq ide. Peterburda töplängän Pulkovo berençese bula ala.

Yewropa Berlegeneñ şuşı niäten küplär Awgust ayında bulğan qaza belän bäyli. Pulkovo oçqıçı Ukraina östendä qazağa oçrap, andağı 170 yulçı häm ekipaj häläk buldı. Moña qädär şirkät tarixında ber genä citdi qaza terkälgän ide, ul Rusiädä iñ imine sanala ide.

Ämmä, Yewropanıñ Aviatsiä Komissiäse Pulkovonı tikşerep, anda şaqtıy küp citeşsezleklär tapqan. Kompaniä citäkçese Gennadi Boldırev süzlärençä, ber yıl eçendä alar 20 kisätü algan, şirkätneñ texnik dokumentları Yewropa taläplärenä turı kilmi dip tabılğan. Komissiä wäkile Olivier Arduan süzlärençä, citeşsezleklär küzgä bärep tora:

"Bez oçqıçnı sütep tormadıq, östän genä qaradıq. Qayber kiräkle cihazlar, terkäw kitapları citeşmi. Oçqıç kütärelgänçe anıñ awırlıq üzäge tikşerelergä tieş. Monı eşlämäw bik qurqınıç. Pilotlarnıñ litsenziäläre yañartılmaw da qurqınıç" di Yewropanıñ Aviatsiä komissiäse wäkile.

Mäskäwdäge aviatsiä belgeçe Aleksandr Veloviç süzlärençä, Pulkovoğa belderelgän däğwalarnı Rusiäneñ här kompaniäsenä belderep bula:

"Yewropa Berlege Rusiäneñ bar hawa transportına kisätü yasıy. Pulkovo yaxşıraq ta, naçarraq ta tügel. Bu soñğı qaza yoğıntısı. Läkin ul qaza teläsä qaysı kompaniädä bula ala ide" di aviatsiä belgeçe Aleksandr Veloviç.

Pulkovo Rusiäneñ 3nçe iñ ere şirkäte. Oçularnıñ 70%-tın çit illärgä yasıy. Yağni, qara isemlekkä kertelgän xäldä aña bankrot bulu yanıy.

Rusiädä qayberäwlär Brusselneñ bu niäten Peterbur yulları öçen köräş belän añlata. Rusiäneñ "Hawa transportı" digän jurnal möhärrire Aleksei Komarov monı kire qağa:

"Rusiä belän Yewropa arasındağı hawa bäyläneşläre ike yaqlı xökümät-ara kileşülär belän xäl itelä. Pulkovo Yewropağa oçudan tuqtasa, Rusiä bu ynüleşlärgä başqa şirkätlären quya ala. Yağni Yewropa Berlegenä Pulkovonı qısıp çığarudan ber fayda da yuq" di Hawa transportı" digän jurnal möhärrire .

Pukovonıñ yazmığı comğa könne häl iteler dip kötelä. Xäyer, ul qara isemlekkä kertelmäsä dä, yuqqa çığarğa mömin. Qayber xäbärlärgä qarağanda Pulkovo Rossiä kompaniäse belän berläşep anıñ isemen alırğa cıyına.

Ali Ğilmi
XS
SM
MD
LG