Accessibility links

дүшәмбе, 5 декабрь 2016, Казан вакыты 03:30

Xäter könen kemnär uzdırır?!


Qazannıñ irek mäydanı qırıyında urnaşqan, elektr utı, telefonı özek tatar ictimaği üzäge yortı binasına kilergä tieşle keşelär soñarıp kildelär. Bolar 2006 yılnıñ Xäter könen uzdırırğa alınğan keşelär. Tatar ictimaği üzäge, milli mäcles, möselman xatın-qızlar berlege, milli mäxällä wäkilläre häm başqa Xäter könen oyıştıruda qatnaşı bulğan keşelär süzne material' yaqnı qayğırtudan başladılar. Tatar ictimaği üzäge binasında başqa yıllardağıça olı yäşkä taba atlawçı abzıy-apalar 15 oktäberdä uzası çaranıñ başta başqa yıllarnı niçek ütkänen iskä aldılar, annan bıyılğısına küçtelär. Söyläşü barışında abzıy-apalarğa “Üzebez” yaña buın xäräkäteneñ koordinatorı Rezidä Safiullina quşıldı. Aña kilep kerügä Xäter könen uzdırunı yäşlärgä tapşırabız dip citkerdelär. Rezidä Safiullina qarşı kilmäde, ölkännär belän yaña buınnıñ quşılıp eşläwneñ näticälege 15 oktäberdä kürener inde di oyıştıruçılar. Bıyılğı Xäter könen oyıştırırğa kiräkle aqçalarnı tabu da älegä problema. İnde xäter köneneñ käğäzdäge iğlannarın “İdel-press” oyışması eşläp birgän. Söyläşü däwerendä xalıqnı isertep, bietep, uram buylap çaptıra torğan bäyräm-çaralarğa aqça qızğanmıylar, ä Xäter könenä xökümätneñ bitaraf bulu da äytelep kitelde. Milli canlı abzıy-apalarnıñ, bıyıl inde yäşlärneñ dä 15 oktäbergä qädär, miting ütäse mäydannı sorıysı, tawış köçäytkeç caylanması tabası, Xäter köneneñ programmasın tözep yuğarıdağılarğa kürsätäse häm başqa bik küp eşlärne başqarasıları bar. Älegä oyıştıruçılarnı xalıqnı niçek cıyarğa digän soraw borçıy. Bu uñaydan törle täqdimnär dä yañğıradı. Mäsälän rus radio-TV, jurnallarına da iğlan birü. 10 oktäberdä Xäter könen oyıştırırğa alınğan milli canlı ölkännär, xäzer inde yäşlär dä, jurnalistlarnı cıyıp 15 oktäberdä uzası Xäter könenä äzerlek turında söylämäkçelär. Röstäm İsxaqi

XS
SM
MD
LG