Accessibility links

пәнҗешәмбе, 8 декабрь 2016, Казан вакыты 17:25

Başqortstannıñ çit töbäklärdäge wäkilläre Ufada kiñäş qordı


Başqortstan üzeneñ töp bäyrämen – Respublika könen bäyräm itü aldınnan Ufağa respublikanıñ törle çit illärdäge häm Rusiä töbäklärendäge daimi wäkilläre zur kiñäşmägä cıyıldı. Başqortstan tarixında berençegä oyıştırılğan şundıy cıyınğa barlıq wäkillär dä kilde.

Bügenge köndä Başqortstan çit illärdä dä üz wäkilleklären buldıru yünäleşendä eşli. Misal öçen, älegä yıraq çit illärdän Avstriä başqalası Venada, Törkiäneñ İstanbul şähärendä, şulay uq Qazaqstan başqalası Astanada daimi wäkilleklär eşli. Şulay uq qayber çit illärdä cämäğät başlanğıçındağı wäkillär dä üz eşçänlegen alıp bara. Rusiäneñ berniçä töbägendä dä, şul isäptän Sverdlovski ölkäsendä, Irımburda, Çiläbedä, Sankt-Peterburgta soñğı berniçä yılda wäkilleklär açıldı. Alar üzara bäyläneşlärne nığıtuda sizelerlek öleş kertä dip belderelde Ufada açılğan kiñäşmädä.

Başqortstan tışqı iqtisadıy bäyläneşlär häm säwdä ministrı Boris Qolbin da üz çığışında wäkilleklär institutınıñ üseşä baruı, alarnıñ härtörle bäyläneşlärneñ nığıtuğa zur öleş kertüe, Başqortstannı çit illärdä nığraq tanıta başlawı xaqında söyläde.

Ministrnıñ urınbasarı Diloriy Yakupov süzlärençä, xäzer qayber töbäklärdäge wäkilleklär nıqlap ayaqqa basqan häm başqalarğa ürnäk bula ala.

Ufada uzğan kiñäşmädä Başqortstannıñ törle illärdäge häm Rusiä töbäklärendäge wäkilläre üzläreneñ eşçänlege xaqında söylägändä törle täqdimnären häm kiñäşlären dä yañğırattı. Misal öçen, Çexiä belän Slovakiä Respublikalarında cämäğät başlanğıçında eşläwçe wäkil Gennadi Belousov Başqortstan eşquarlarınıñ şuşı illär belän qıyuraq xezmättäşlek itüen teläde. Üz yağınnan yärdäm kürsätäçägen dä äytte ul.

Sverdlovski ölkäsennän kilgän wäkil Näfisä Tömänseva ayıruça gumanitar ölkälärdä eşçänlekläre näticäle buluı xaqında söyläde bu kiñäşmädä.

Başqortstannı törle taraflarda wäkillek itüçe keşelär Ufadağı cıyında urtaq problemaları xaqında da söyläşte häm respublika citäkçelegennän törle sıyfattağı yärdämnärne dä soradı. Ä, ğomumän alğanda, bu söyläşü Başqortstannıñ Rus däwlätenä quşıluına 450 yıl tulu aldınnan, anı dönyağa häm Rusiä töbäklärenä kübräk tanıtu burıçların quydı. Çönki çit illärdä dä, xätta Rusiäneñ üzendä dä Başqortstan digän respublikanı küp keşe belep betmi äle. Başqort balı belän genä dönyağa tanılıp bulmayaçağın Başqortstannıñ üzendä dä añlıylar bulsa kiräk.

Fänis Fätxi, Ufa

XS
SM
MD
LG