Accessibility links

якшәмбе, 11 декабрь 2016, Казан вакыты 07:26

Elekke sovet illäre Rusiä-Gruziä nizağına nindi mönäsäbät belderä?


Rusiä prezidentı Vladimir Putin ilgä kilüçe migrantlar öçen qağidälärne tärtipkä salırğa quşqannan soñ, Mäskäw belän Tiflis arasındağı bäxäs aqrınlap başqa illärgä dä yoğıntı yasıy başlar digän şöbxälär tudı. Elekke sovet respublikarı Mäskäwneñ transport blokadası alarnıñ da iqtisadına zıyan kiterä, gruzinnardan soñ, başqa millätlär dä Rusiädän quıla başlar dip borçıla.

Mäskäw belän Tiflisneñ üz-ara "mançışuına" elekke sovet illärendä yäşäwçe xalıqlar törle mönäsäbät belderä. Kemder Gruziä belän soqlana, kemder Mäskäwneñ ğämällären xuplıy, kemder üzeneñ kiläçäge öçen borçıla.

Misal öçen menä bu Belarus keşese Rusiäne Gruziä belän tağı da qatıraq eş itergä tieş di:

"Gruzinnar xäzer artığın qılana. Üzläre cancalğa bara. Minemçä, Rusiä alarğa qarata tağı da qırısraq bulırğa tieş."

Ä menä Qazan uramındağı keşelär bu xällärgä borçılu belderä, Gruziäneñ möstäqillen xuplıy:

"Elemtälärne tuqtatırğa kiräkmi ide inde. Bu wäzğıättän tınıç yul belän çığarğa kiräk ide. Bez bit 21 ğasırda yäşibez, minemçä bu xäldän üzara söyläşep çığarğa kiräk."

"Minem qaraş bik yaxşı, Gruziä üz ireklelege belän yäşärgä tieş, üz yulların tapsınnar. Här il üz irege belän yäşärgä tieş."


Mäskäw belän Tiflis arasındağı kierenkelekne elekke sovet illäre borçılıp küzätä. Rusiäneñ transport blokadası kemneñder iqtisadına inde xäzer ük suqıt. Mäskäw Gruziädän soñ şul uq çaralarnı başqalarğa qarata da qullanır dip borçıluçılar bar.

Atnakiç könne prezident Putinnıñ belderüennän soñ borçular tağı da köçäyde:

"Rusiä xökümätenä kiçekmästän bazarlarda tärtip urnaştıru öçen tieşle qararlar qabul itergä, anda eşlägän çit il keşeläre arasında tärtip urnaştırırğa, Rusiä qanunnarın bozğan çit il keşeläre öçen viza tärtiben qırıslatırğa quşam" di Rusiä prezidentı.

Rusiäneñ Migratsiä xezmäte ütä cähätlek kürsätep, qanunsız migrantlar öçen cazanı qırıslattı. İllärenä qarap, migrantlarğa Rusiädä qalu möddäte kimetelä. Rusiägä eş ezläp kilgän distälägän meñ keşe öçen küñelle xäbärlär tügel:

"Elekke Sovet Berlegennän bulğan xäzer Rusiädä yäşäwçe här keşe Gruziädäge wazğiätne yörägenä yaqın alırğa tieş. Çönki bügen gruzin bulsa, irtägä ul üzbäk, taciq bula ala" di Mäskäwdä eşläwçe bu Taciq keşese.

Mäskäwneñ Gruziägä qarata çamadan-tış qırıs adımnarı Könbatışqa qarap yäşärgä mataşqan respublikalar öçen ber sabaq digän fikerlär äytelä. Küplär isä bu konfliktnı Mäskäwneñ Quşma Ştatlarğa qarşı alıp barğan kiñräk uyınınıñ ber öleşe itep kürä.

Washington belän Brusselneñ bu konfliktqa bik tä itäğätle mönäsäbät belderüe, elekke sovet illärendä Mäskäw yoğıntısı yänä köçäyä digän borçular tudırdı.

Ali Ğilmi
XS
SM
MD
LG