Şimbä 7 üktäber könne üz öyendä tanılğan jurnalist Anna Politkovskayanıñ mäyete tabıldı. İnterfax mäğlümat agentlığı xäbär itüençä, mäyetne Mäskäw waqıtı belän kiçke 5 tulıp 10 minutta liftta anıñ kürşese kürgän. Milisiä mäyet yanında qoral häm 4 yadrä tabılğanın xäbär itte. 2004nçe yılda uq Politkovskayanı ağulap üterü tırışlığı yasaldı, digän farazlar bar ide. Beslan faciğase waqıtında jurnalist xanım Mäskäwdän Beslanğa oçqanda, çäy eçep ağulanğan ide. Novaya Gazeta xäbärçese Anna Politkovskaya, üzeneñ Tönyaq Kavkaz häm Çeçnya turındağı kisken mäqäläläre belän tanılğan ide. Mäskäw prokurorı Yury Semin üterü mäddäsendä cinäyät eşe açılğan, dip belderde. Rusiä jurnalistları berlegeneñ general sekratare İgor Yakovenko, Exo Moskvı radiosına, Politkovskaya, hiçşiksez, – qurqunı belmägän, iñ awır temalarnı tikşerep yaqtırta ala torğan keşe ide, dip belderde.
