Accessibility links

шимбә, 3 декабрь 2016, Казан вакыты 20:41

İran turında söyläşülär däwam itäçäk


Comğa könne Londonda oçraşqan 6 il wäkilläre İranğa çikläwlär kertü turında kiñäşläşergä buldı. Çikläwlär BMO nizamnamäseneñ 41nçe mäddäse nigezendä kertelergä mömkin. Älege maddä iqtisadi häm diplomatik sanksiälär kertügä yul aça, xärbi köç qullanunı kire qağa. Britaniä, Fransiä, Qıtay, Germaniä, Rusiä häm AQŞ diplomatları oçraşuın Britaniä tışqı eşlär ministrı Margaret Beckett qunaq itte. Anda qatnaşuçılar isemennän çığış yasap, Beckett, Tährannıñ uran bayıtuın tuqtatmawı – borçılu tudıra, dip belderde:

"Venada, ike yul bar, dip äytkän idek. İrannıñ – döres yulnı saylamawı - borçılu tudıra. Bez kileşügä ireşü tırışlıqların däwam itäçäkbez. 1nçe yün könne yasalğan täqdimnärebez äle dä köçendä qala."

Biredä – Yevropa illäreneñ İranğa iqtisadi täqdimnäre turında süz bara. Ämma İran üz cawabında, täqdimnärdä ike törle mäğnä tabıp, söyläşülärne däwam iter öçen uran bayıtunı tuqtatudan baş tartuın belderde. Comğa könne, AQŞ däwlät sekretare urınbasarı Nicholas Burns, ägär dä Tähran fikeren üzgärtsä, könbatışnıñ täqdimnäre köçendä qala, dide.

İranğa çikläwlär kertergä çaqırğan rezolüsiä ölgese kiläse atnada äzerlänä başlayaçaq.

Qıtay belän Rusiä İranğa sanksiälär kertügä qarşı çığıp kilde. Bu ike ilneñ İran iqtisadında üz mänfäğätläre bar. Ämma söyläşülär kiräklegen Rusiä kiçä dä qabatladı. Tışqı eşlär ministrı Sergey Lavrov, BMO İminlek Şurasında, İrannı alar täqdimnären qabul itergä öndäw öçen tağın söyläşülär ütäçägen belderde.

İran räsmiläre isä, ber nindi dä çikläwlär alarnıñ uran bayıtuın tuqtatmayaçaq, dip belderep kilä. Çärşämbe könne, prezident Mäxmüd Äxmädinecad, İran – qüätle il, häm ber nindi dä basımğa birelmiäçäk, dip belderde, ämma söyläşülärgä äzer bulğanın östäde:

"Bez söyläşülär häm kiñäşläşülär yaqlı, bez tınıçlıql yaqlı, ämma barısı da qanun häm ğädellek qısalarında bulırğa tieş."

Britaniä, Fransiä, Qıtay, Germaniä, Rusiä häm AQŞ diplomatları İrannıñ atom programması turında söyläşülärne kiläse atnada däwam itäçäk.

Alsu Qormaş
XS
SM
MD
LG