Accessibility links

İjawda Ramazan ayı fazıylätläre ütälä


Ramazan ayınıñ berençe yartısı uzdı da. Udmurtiädä yäşäwçe möselmannar könnären izge ğämällär qılıp, kiçlären ğibädättä uzdırdı. Kemder üz öendä ğailäse belän şäriğät qanunnarın tieşle däräcädä ütärgä tırışsa, kemder mäçetlärgä yörüne xuş kürä. Bu könnärdä İjaw Cämiğ mäçetendä din qärdäşlärebez belän oçraştım.

Kiçke namazğa qädär säğättän artıq waqıt bulsa da, törle yäştäge din qärdäşlärebez mäçetkä cıyıla başladı. Mäçet qarşında inde berniçä yıl islam dine nigezlären öyränüçe malaylar da här kön axşam namazın mäçettä uqıp, biredä iftar aşap, täräwix namazların da uqıp kitälär ikän. Şundıylar arasında bıyıl sigezençe sıynıfta uquçı Räzil İsmägıylev ta bar. «Här kön uraza tota almıym, ciñel tügel, ämmä mäçetkä täräwix namazların uqırğa kilergä tırışam», dip urtaqlaştı Räzil İsmägıylev. Räzilneñ dusları mäktäplärdä, texnikumnarda uqi, ramazan ayı fazıylätlären tieşle ütärgä omtılalar.

Ütkän yıllar belän çağıştırğanda bıyıl täräwix namazlarına keşelär kübräk cıyıla dip urtaqlaştı İjaw Cämiğ mäçete imamı Faiz xäzrät Möxämmätşin. Bıyıl ramazan ayında täräwix namazlarına yörüçe balalarğa keçkenä genä buläklär dä äzerlägännär. Un kön sayın namazlarnı qaldırmıyça kilüçelär büläklärgä iä bulaçaq. Mäçetkä ramazan ayında ğibädät qılırğa küpläre ğailälär belän kilälär. Dörestän dä, äti-äniläre, äbi-babaları yanında nänilär dä küpläp yöri.

Mäçet aşxanäsenä iftar mäcleslärenä dä keşelär küpläp kilä. Aşlarnı din qärdäşlärebezneñ finans yärdämendä äzerlilär. Biredä kön sen 250—300 läp keşe awız aça. Berniçä yıl rättän iftar aşların oyıştırunı Gölsem Sitdiqova üz cilkäsenä ala. Gölsem xanım süzlärençä, bıyıl keşelär ramazan ayı başlanğançı uq awız açtıru öçen könnärne aldan bilgeläp quyğannar. Altı peşekçe bik tämle itep aşlar äzerli, kön sayın rizıqlarnı da törleländerep äzerlärgä omtılalar. Aşlardan awız açuçılar qänäğät. Nuriä Äminova belän Rezidä Minnexanova här kön mäçetkä namazğa, iftarğa ğailäläre belän kilä ikän. Mäçet ähelläre ramazan ayında dini yolalarnıñ ütälüe belän qänäğät.

Xämidä Ğayfullina, Udmurtiä

XS
SM
MD
LG