Accessibility links

пәнҗешәмбе, 8 декабрь 2016, Казан вакыты 17:16

Peterburda tatar rässamnarınıñ “Sixri dönyası”


6 üktäberdä Peterburgnıñ üzäge- Neva prospektında- 7 tatar rässamı tağın ber kürgäzmä açtılar. Başlıça üz köçläre häm milli-möxtiriätneñ berqädär moral' yärdäme belän. Bu kürgäzmä dä Tatarstanda iğlan itelgän “Ädäbiät häm sänğät” yılı qısalarında uza.

Kürgäzmäneñ iseme-“Sixri dönya”. Anıñ töp geroe, älbättä, Peterburg. Üze ük ber tılsımlı, äkiäti dönya. Ämma här rässam anı üzençä añlıy, üzençä taswirlıy. Robert Miftaxetdinov öçen Peterburg- yılğa-kanallarda, yüeş asfal'tta üzeneñ böeklegenä, maturlığına soqlanuçı arxitektura ürnäkläre bulsa, Larisa Äxmädiewa öçen şähär barınnan da bigräk- serle balet dönya'sı. Galereyanıñ xucası Anatoliy Bakulin: “Bu kürgäzmä galereyanıñ “Tınıç şähär” programmalıysına kerä. Programmanıñ maqsatı- tamaşaçılarnı yänäşädä yäşäwçe, şähärebezne berdäy yaratuçı törle xalıqlarnıñ icatı belän, alarnıñ Peterburg sänğätenä, mädäniätenä kertkän öleşläre belän tanıştıru. Şul isäptän tatar rässamnarınıñ da. Alarnıñ tarixi watannarı belän bäyläneşen äsärlärendä, yaratqan buyalularında tanıp bula. Tatar rässamnarı da üz talantları, milli tösläre belän Peterburg mädäniäten üsterälär, bayıtalar”, -dide Anatoliy Bakulin.

“Liğa natsiy”digän ictimaği oyışmanıñ räise Ğamzat Sokiev:”Kürgäzmägä kilgändä uylap kildem: nindi ikän ul Peterburg tatar rässamnarı küze belän qarasañ dip.Kötkänem buşqa bulmadı.”, - dide. “Yaña yıldan “Peterburg milli mädäniätlär yortında” da törle millät rässamnarınıñ kürgäzmälären uzdıra başlayaçaqbız. Berençe itep tatar rässamnarın çaqırabız. Çönki bu kürgäzmä kürsätkänçä, tatar rässamnarı- ölgergän masterlar, alarnıñ äsärläre teläsä nindi muzeynıñ, yortnıñ, ofisnıñ bizäge bula ala.Ämma bu qırıs, räximsez çorda rässamnarğa moral' yärdäm genä tügel,ä matdi yärdäm dä kürsätergä kiräk ”,- dide Ğamzat Sokiev. Anıñ süzlärenä Tatarstannıñ Peterburgtağı daimi wäkile Şamil Äxmätşin da quşıldı. Ul kürgäzmäneñ bik uñışlı ikäne, şäxsän üzenä küp äsärlärneñ oxşawı turında äytep ütte. Mondıy kürgäzmälärgä aqçalı keşelärne, eşquarlarnı kübräk çaqırırğa kiñäş itte.”İcat keşelärenä, äsärlären satıp alıp, alar ğına yärdäm itä ala.Kürgäzmä yabılğaç, üzem dä berniçä äsär satıp alaçaqmın”, - dip tä wäğdä itte Şamil Äxmätşin.

Kürgäzmä Neva prospektı 166 yortta “Natsional'nıy sentr” galereyasında 26 üktäbrgä qädär däwam itäçäk.

Gölzadä Kamalova, Sankt- Peterburg

XS
SM
MD
LG