Accessibility links

чәршәмбе, 7 декабрь 2016, Казан вакыты 13:35

9 üktäber - Bötendönya poçta köne


Dönyada 5mlnğa yaqın keşe poçta tarmağında eşli. Rusiädä poçta xezmätkärläreneñ sanı 320 meñ. Şuña kürä dä poçta - il iqtisatınıñ ayırılğısız ber öleşe bulıp sanala. Rusiä poçtalarında ber yılda milliardtan artıq xat eşkärtelä. Hönäri bäyrämnären poçta xezmätkärläre üz eş urınnarında qarşı aldı. Üz xezmäte xaqında “Tatarstan poçtası”nıñ operatorı Ruzilä Sälixova bolay dip söyläde:

Bezneñ eş bik küp xäzer. Ölgerer genä! Bik küp törle tüläwlär kilä, banderol', aqça küçerülär. Min poçta xezmätennän qänäğät kebek. Qaywaqıtta markalar, konvertlar citmi. Annarı tağın şunısı bar - bezneñ eş säğätläre arttı xäzer. Kiçke 9га qädär eşlibez. Alabız 5 meñ sum. Monnan tış premiälär dä bulğalıy. Ul waqıtta 6 meñgä dä citä inde. İrläre bulğan xatın-qızlarğa citä inde bu. Ämma bezneñ monda küp kenä qızlar üzläre genä yäşi, alar fatirğa üzläre tüli. Menä alarğa qıyınğa turı kilä inde.

“Tatarstan poçtası”nıñ operatorı Ruzilä Sälixova buldı.

Poçta xezmätennän qullanuçılar bügen poçtanıñ eşçänlege belän qänäğätme? Bezneñ bügenge Açıq mikrofon säxifäse şul xaqta. Qazanlılar fikeren tıñlıyq:

-Min qänäğät. Bik äybät eşlilär!

-Äye qänäğät, ämma soñğı waqıtlarda poçta belän qullanğan yuq döresen genä äytkändä. Çönki xäzer kübräk telefonnı qullanabız. Häm tağın ber närsä bezneñ daimi toraq yuq. Şuña kürä kiräkle ğazet-jurnallarnı satıp alabız.

-Min poçtadan qänäğät tügel. Çönki xatlar bik ozaq yöri. Xäzer bit telefon, internet zamanı, poçta belän bik qullanğan yuq inde. Şulay da poçtanı min bik kiräk dip sanıym. Telefonda böten närsäne söyläp beterep bulmıy bit. Monda yärdämgä xatlar kilä. Xatta böten närsäne äytep bula, xätta şiğerlär belän dä.

Qazanlılar fikeren işettegez. “Tatarstan poçtası”nıñ “Rusiä poçtası”na quşılu quşılmaw mäs’äläsenä kilgändä, “Tatarstan poçtası”nıñ xoquq belgeçe Yuldaş Musin fikerençä, älegä “Tatarstan poçtası” möstäqillegen yuğaltmağan. Ämma Yuldaş Musin kiläçäktä Tatarstan poçtası barıber “Rusiä poçtası”na keräçäk digän farazın da äytte.

Al'bina Zäynulla

XS
SM
MD
LG