9 oktäber könne Milli- mädäni üzäktä Tatarstannıñ atqazanğan sänğät eşleklese tanılğan şağir Xarras Äyupneñ 60 yıllıq yubiley kiçäse uzdı. Yubiley kiçäse uzğan milli mädäni üzäkneñ zalında alma töşär urın da yuq ide, tatarnıñ zıyalı cämäğätçelege cıyılğan zal şığrım tulı buldı. Qunaqlar xätta Tatarstannnıñ Möslim yaqlarınnan da kilgännär ide.
“ Xarras Äyup ul Tatarstan kitap näşriätendä 24 yıl buyı xezmät quyğan keşe. Anıñ 12 yılın ul baş möxärrir bularaq eşläde. Här yıl sayın 100 artıq yazuçınıñ kitapların çığarğanın isäpkä alsaq, 24 yıl buyına ul meñnär kitap bastırıp çığarğan keşe.”dide anıñ turında TR yazuçılar berlege räise İlfaq İbrahimov.
Xarras Äyupneñ yubileyena bağışlanğan “Ğämäl däftäre” dip atalğan icat kiçäse Aydar Fäyzraxmanov citäklägän tatar däwlät fol'klor ansamble çığışı belän başlanıp kitte. Alar yubilyarnıñ şiğerenä Mäsgüdä Şämsetdinova yazğan köy belän tuğan “Ğömerlär uzıp bara” cırın başqardılar.
Kiçä barışında Xarras Äyupneñ küpsanlı şiğerläre uqıldı: Xarras Äyupneñ şiğerlärenä küp kenä kompozitorlar köy yazğannar. Zöfär Xäyretdinov anıñ şiğerenä yazılğan cırların üze başqardı. Ä Xarras Äyupneñ şigerenä Zöfär Xäyretdinov icat itkän “Qayda sin garmun? cırın Zakir Şahban başqaruında tamaşaçı ayıruça bik cılı qarşı aldı. Xarras Äyupneñ şigerlären yäşlär dä yarata. Yäş cırçılardan Marat Fäyruşin “Awıl qarçıqları” cırın, Närkäs Xarasova “Bez bit bolay tübän tügel idek” cırın başqardı.
Cırçılar Vil' Usmanov, Zölfiä Zaripova, Möslimnän kilgän İndira Fazlıytdinova çığışın da tamaşaçı zur alqışlar belän qarşı aldı.
Xarras Äyup konsertta qatnaşuçılarğa üzeneñ räxmätlären belderde häm Namaz turındağı şiğeren tamaşaçı aldında uqıdı.
Yubilyarnı qotlarğa TR Mädäniät ministr urınbasarı Ayrat Cabbarov kilgän ide. Ul TR Premyer-Ministrı Röstäm Miñnexanovnıñ “Räxmät xatı”n häm yazuçılar fondınnan matdi yärdäm tapşırdı. TR Yazuçılar berlege räise İlfaq İbrahimov Xarras Äyupneñ icatında tabiğät, keşelekneñ ruxı, keşe yazmışı, ruxıbıznıñ saflığı tuğrılıq häm mäxäbbät bar dide. Anıñ üze häm şağirneñ anıñ yaqtaşları turında ul menä närsä dide.
“ Xarras Äyup ul Möslim yağınnan. Ğomumän bügenge kön ädäbiäten bez Möslimdä tuıp üskän şağirlär, yazuçılardan başqa küz aldına da kiterä almıybız. Foat Sadriev, Zölfät, Nais Gambär , Daniä Zahidullina, Marsel' Bakirov, Flüs Latifi häm başqalar. Bügenge köndä Möslimdä şulay uq yäş ädäbitçelärneñ ör yaña buını üsep kilä. Bu yubiley kiçäsendä bez alarnı da barlıybız. Ädäbiätebezneñ kiläçäge ömetle”dide ul. Tatar kongressı räise Rinat Zakirov anıñ şiğriäten bik yıraqlarda , çit illärdä dä toyıp yäşägän millättäşlär isemennän räxmätlären citkerep “Räxmät xatı”n tapşırdı. “ Möslimä”gäzite baş möxärrire Älmira Ädiätullina aña şämail büläk itte häm ul Xarras Äyup turında bolay dide.
“Bezneñ şuşındıy ruxiät dönyasın ğämle itep yaqtırta belüçe şağirebez bar, annan ürnäk alığız !
Şulay uq şağirneñ tuğan yağı Möslimnän anıñ yaqtaşları zur ber delegatsiä belän rayonnıñ xakimiät başlığı Räşit Xäbipov citäkçelegendä kilgän ide. Alar arasında Xarras uqığan waqıtta mäktäp direktorı bulıp eşlägän uqıtuçı da bar ide. Tatarstan kitap näşriäte kollektivı qotlawın Damir Şakirov citkerde.
Mälikä Basıyr
