Accessibility links

шимбә, 3 декабрь 2016, Казан вакыты 18:37

Açıq mikrofon: Tarixi binalarnı tözekländerergäme, ällä yañaların tözergäme?


Çärşämbedä Qazanğa Barselona şähäreneñ baş arxitektorı Xose Asebil'o kilde. Xose äfände Qazan xakimiätendä Tatarstan arxitektorları qatnaşında uzğan kiñäşmädä qatnaştı. Anda Qazannıñ tarixi urını bulğan - İske tatar bistäsen kiläçäktä üsterü yunäleşe tikşerelde. Barselona arxitektorı fikerençä, İske tatar bistäsendäge tarixi binalarnı tözekländerü bik möhim. Monıñ öçen bistädä infrastruktura buldıru, yullarnı tözekländerü häm cirgä bäyäne kütärep, annan kergän aqçağa tarixi binalarnı tözekländerü mömkinlege qaraldı kiñäşmädä. Qazanlılar iske tarixi binalarnı tözekländerügä uñay qarıymı? Ällä inde bu binalar urınına yaña zamançaların salırğa kiräk dip sanıymı? Bügenge Açıq mikrofon säxifäse şul xaqta. Qazanlılar fikeren Güzäl Zıyätdinova tupladı.

Minem uylawımça, tarixi binalarnı qaldırırğa kiräk, çönki ul bezneñ tarixıbız. Kiläçäk buınğa da bezgä qädär häm bez niçek yäşägänne kürsätergä bulır ide.

Alarnı qaldırıp, tözekländerergä kiräk. Alar bit bezneñ şähärebez yadkärläre.

Yaña binalar bik küp inde alar, iskelären qaldırırğa kiräk.

Yaña binalar tözü öçen bik zur aqçalar kiräk bulır ide, ä menä iskelären tözekländerü anıñ qädär zur keremnär taläp itmi.

İske binalarnıñ, berençe çiratta, xalätenä qararğa kiräk inde. Ägär bik cimerek xäldä bulsalar, alar urınına başqa binalar tözergä, ä yaxşı xalättägelären tözekländersäñ, alar şähärebezneñ yözen saqlap qalır ide.

İske binalar urınına yaña zur etajlı yortlar tözesä, uñaylıraq bulır ide.

Küz aldında mäşhür şäxeslä torğan niqädär binalarnı süttelär, alar urınına başqaların tözedelär. Ä minemçä, iske binalarnı saqlap qalırğa kiräk. Çönki bez tarixıbıznı saqlap qalsaq, tatar xalqınıñ kiläçäge dä bulaçaq.

Meñyıllıq Qazanda şundıy iske yortlar bulu – şähärneñ yözen boza dip uylıym. Alar urınına zamançaraq sport sarayları, yäisä teatr tözesälär, yaxşıraq bulır ide. Tözekländerep tä torası yuq alarnı, şunda uq cimerergä kiräk.

Ä bälki ul yortta berär tanılğan kompozitor, yäisä yazuçı yäşägänder? Qazan bit inde ul iske şähär, şuña kürä iske binalarnı da tözekländerergä kiräk.

Älbättä, härkemgä dä üz tarixın belergä kiräk. Läkin ul iske yortlarnı tözekländerep kenä yäşlär alar belän qızıqsına başlar mikän soñ?

Minemçä, iske binalarnı elekke qiäfätlären saqlap yañartırğa kiräk. Bälki ul yañadan şundıy uq formada tözü buladır inde, läkin ul binalar moña qädär bulğan güzälleklären saqlap qalırğa tieş. Alar şähär tormışına bilgele ber tösmer östilär. Ä zamança binalarğa üzgärtü kiräk tügel, alar bit bolay da citärlek.

Güzäl Zıyätdinova.

XS
SM
MD
LG