Accessibility links

шимбә, 3 декабрь 2016, Казан вакыты 03:27

Çallı gruzinnarı xäle


Şuşı wäzğıät buyınça Çallı xakimiätendä dä berqädär söyläşü bulıp aldı. Ayırım alğanda, şähär xäkime İldar Xalikov xucalıq citäkçeläre cıyılışında bu uñaydan belderü yasadı. Anıñ belderüe mondıy: "Yarım- yortı aqılı bulğan ber gruzin arqasında xalıq qıyınlıq kürergä tieş tügel. Gruziäneñ awıru citäkçelege belän gruzinnarnı häm Kavkaz respublikalarınnan başqa xalıqlar belän butarğa yaramıy. Gruzinnar Çallığa "KamAZ" tözergä kildelär häm bez berdäm ğailä bulıp yäşädek, alğa taba da şulay yäşärbez". İldar Xalikovnıñ älege belderüenä gruzinnarnı nıqlap tikşerülär säbäpçe bulğan. Çallıda yäşäwçe gruzinnar qanäğätsezlek belderä başladılar. Mäsälän, otstavkadağı general- mayor, "Yedinaya Rossiä" firqäsen yaqlawçılarnıñ citäkçese Deni Abramaşwili şuşında uq militsionerlarnıñ berniçä tapqır tikşerü belän kilülären äytte: "Bez Rusiädä inde 50 yıl yäşibez, xatınım Ukrainadan. Min Rusiä Watandaşımı, yuqmı? Minem cawap- Rusiä Watandaşı. Mine tikşerergä kilgän ölkän leytenant äytte, yänäse, Vladimir Putinnıñ gruzinnarnı tikşerergä maxsus kürsätmäse bar. Min üzem Putinğa mondıy telegramma cibärä alam: "Xörmätle prezident, sezneñ däräcägezne töşerälär. Min sezneñ öçen tawış birep kenä qalmadım, agitatsiä dä yasadım. Şulay bulğaç, ni öçen bezneñ watandaşlarnıñ xoquqların qısalar?"

Çallıdağı gruzin cämğiäte räise Jumber Yesartiä dä şuşı fikerdä: "Äye, säyäsätçelär xalıqnıñ ğäyebe yuq, disälär dä, axır çiktä ğadi xalıq zıyan kürä. Tikşerü öçen 1,2,3 tapqır kilälär. Bu bik küñelsez küreneş. Kürşelär dä ällä ni uylap beterergä mömkinnär. Artıq zıyan yuq, şulay da yäşäw qıyınlaştı, di gruzin cämğiäte räise Jumber Yesartiä. Şuşı könnärdä Deni Abramaşvili citäkçelegendäge "Çallı Kavkaz" ansamble çit respublikalarğa konsert belän barmaqçı bulğannar, läkin, Rusiä- Gruziä konfliktı alarnı barmasqa mäcbür itkän. Abramaşvili mondıy misal da kiterde: Gruziä başqalası Tiflistä iñ zur hawa alanınıñ direktorı tatar keşese. Anıñ mänfägät'lären berkemneñ qısqanı bulmadı.

Ğafiulla Ğaziz Çallı

XS
SM
MD
LG