Accessibility links

шимбә, 3 декабрь 2016, Казан вакыты 05:28

Tatar yäşläre çittä uqırğa telime?


Bilgele bulğança Tatarstannan berniçä distä student grant nigezendä Rusiä häm çit il yuğarı uqu yortlarında uqu mömkinlegen aldı. Monıñ öçen barı mäğärif ministrlığı belän şartnamä genä tözärgä kiräk. Şartnamä tözüçelärneñ qayberläre inde bügenge köndä uqırğa kitkän.

Talib-talibälärneñ qayberläre isä xäzerge waqıtta kitärgä äzerlänä ikän. Çaqırunı ğına kötälär. Mäsälän bıyıl Qazan däwlät mädäniät häm sänğät universitetın tämamlağan Sömbel Bilalova Mäskäwneñ GİTİSında uqırğa qarar qılğan. Bu xaqta ul “Azatlıq” radiosına bolay dide

Başta inde şul testlar, äñgämälär ütkäç, “barasıñ” dip cäy köne ük äytkän idelär. Ämma älegä qädär qayçan kitäsen tögäl genä äytmilär, çönki anda şartnamä belän nindider problema kilep çıqqan. Läkin kiläse atnağa uq bälki kitärbez. Mädäniät häm sänğät universitetınnan şul GİTİSqa unike keşe bara.

Sömbel Bilalova äytüençä, ul äle şartnamäneñ barlıq neçkälekläre belän dä tanış tügel. Läkin qayber şäkertlär şartnamä eçtälege belän tanışqaç anı üzläre öçen qulay tügel dip tapqannar. Mäsälän, berençedän anda aldan uq 30 meñ sum tiräse aqça tüläp quyası di. Bu inde student kesäse öçen şaqtıy küp aqçalar. Sömbel Bilalova isä anı stipendiädän totıp qalaçaqlar ikän dip belderde. Läkin bolay da aşarğa ğına citärlek stipendiäne uqu öçen dä öleş çığarsañ bötenläy ayaq suzarğa mömkin.

Monnan tış uqunı tämamlağannan soñ student mäcbüri räweştä kire Tatarstanğa äylänep qaytırğa tieş. Ägär çittä qalırğa teläsä isä, ul anıñ öçen totılğan aqçanı – bu 100 meñnän arta kire Xökümätkä qaytarırğa tieş bula. Bilgele ki, xakimiät monı belemle studentlarnı üzebezdä tuplaw maqsatınnan eşli. Läkin talib-talibälär ber kitkäç Mäskäwdä qalunı qulayraq kürer ide. Bu xaqta Qazan däwlät universitetınıñ tatar jurnalistikası bülegeneñ 5нче kursında belem aluçı Ğadel Galämetdinov “Azatlıq” radiosına bolay dide

Mäskäwgä barsam, kire Qazanğa qaytu teläge minem bulmas dip uylıym. Ä kontrakt buyınça, Mäskäwdä uqığannan soñ, bez monda qaytıp, öç yıl buyı üz hönärebez buyınça uqırğa tieş. Mäskäwdä qalırğa mömkin, ägär sin üzeñä sarıf itelgän aqçalarıñnı kire qaytara alsañ. Ämma ul şaqtıy ğına zur summa. Annarı bez bit inde monda bergä cıyılıp, klassik räweştä uqibız. Ä anda bolon sisteması buyınça uqıtalar, dimäk inde küp närsäne üzlegeñnän uqırğa, üzeñä uzläşterergä kiräk bulaçaq. Ä miña, Qazan keşese bularaq, andağı Mäskäw balaları belän bergä uquı, andağı jurnalistlar belän aralaşu, andağı televideniegä baru qızığraq. Ä alay bulsa, miña inde Qazanda uqu yaxşıraq.

Ğadel Galämetdinov ul Mäskäwdä uqıp qaytqaç barıber xäzer ük eşli torğan “Yaña Ğasır” televideniesenä barırğa mäcbür bulaçaq. Çönki älläni saylaw mömkinlege yuq. Ä Mäskäwdä qalsa isä mömkinleklär zurraq dip sanıy. Dimäk, qaydadır kitep uqudan bernindi dä fayda yuq bulıp çığa. Äle tağın Mäskäwdäge programma ul uqı torğan Qazan universitetı belän turı kilmäskä mömkin. Şul nisbättän Mäskäwdä uqımağan fännärne ul monda qaytqaç imtixannı tapşırırğa tieş bulaçaq.

Landış Xarrasova.

XS
SM
MD
LG