Accessibility links

якшәмбе, 4 декабрь 2016, Казан вакыты 03:04

Rafael Baydäwlätov premier bulıp qala


Başqortstannıñ elekke Prezidentı Mortaza Räximov, Rusiä başlığı Vladimir Putin quışuı buyınça, tağın da 5 yılğa respublika Prezidentı itep qaldırılğannan soñ, Başqortstan Xökümäte ğämäldäge qanunğa yaraşlı otstavkağa kitkän ide. Yaña Premyerğa kem täqdim iteler ikän digän sorawğa cawap üzen ozaq köttermäde. Mortaza Räximov respublika Xökümäte başlığı wazıyfasında yañadan da Rafael' Baydäülätovnı kürergä telägänen äytte. Atnakiç könne qabul itkän qararı belän ul, Başqortstan Xökümäte räise wazıyfasına täğäyenläw öçen, Rafael' Baydäülätovnı Başqortstan Däwlät Cıyılışı-Qorıltay tikşerüenä täqdim itte.



Mäğlüm buluınça, Başqortstan parlamentınıñ çirattağı utırışı 26 üktäber könne ütärgä tieş. Näq şul könne deputatlar Rafael' Baydäülätovnı tağın da premyer itep qaldıru mäsäläsen qarayaçaq. Bu mäsäläneñ uñay xäl iteläçägenä berkem dä şiklänmi. Respublika Däwlät Cıyılışı deputatları Mortaza Räximovnı bik nıq xörmät itä çönki. Anıñ teläge belän tulısınça kileşä härkem. Şul utırışta uq Rafael' Baydäülätov respublika Ministrlar kabinetı äğzaların – ministrlarnı häm törle däwlät idäräläre citäkçelären dä täqdim itäçäk dip kötelä.

Atnakiç könne Mortaza Räximov ikençe ber färmanın da imzaladı. Aña yaraşlı, Başqortstan Prezidentı xakimiäte başlığı itep yañadan da Radiy Xäbirov qaldırıla. Şulay itep Başqortstan Prezidentı wäqälätlären ütäw öçen täğäyenlängän Mortaza Räximov üzeneñ elekke yaña statusında üzgäreşlär kertüen başladı. Bu üzgäreşlär, nigezdä, üzgäreşsez bulır, dip kötelä. Säyäsi küzätüçelär fikerençä, Prezident üze yaxşı belgän häm sınağan küpçelek türälärne üz wazıyfalarında qaldıraçaq.

Şul uq waqıtta Başqortstannıñ räsmi matbuğat basmalarında kön sayın Mortaza Räximovnıñ tağın da Prezident itep qaldırıluına çiksez şatlıq beldergän yazmalar basıla. Ğadi eşçelärdän alıp, törle däräcä citäkçelär, yazuçılar da cälep itelä bu eşkä. Misal öçen, başqort telendä çığuçı “Başqortstan” gazetasınıñ comğa sanınıñ ike bite tulısınça şundıy yazmalarğa bağışlanğan. Arada iñ iğtibarnı cälep itkäne keräşen tatarı, dramaturg Näcip Asanbayıvnıqı. “Räximovnıñ aqılına häm uñğanlığına soqlanam” dip isemlängän yazmasında Näcip Asanbaev Mortaza Räximovnı küklärgä kütärep maqtıy. Başqortstannı çäçäk atuçı töbäkkä genä äyländerep qaldırmadı, ä yözlägän millät wäkilläreneñ dus-tatu ğömer itüçe bäxet utrawın buldırdı, digän fikeren äytä ul.

XS
SM
MD
LG