Accessibility links

якшәмбе, 4 декабрь 2016, Казан вакыты 09:18

Onıtılmas Azat Abbas


Tatarstan xäbärläreneñ comğa çığarılışın küñelsez xäbär belän başlarğa mäcbürbez, xörmätle tıñlawçılar. Tatarstan cämäğätçelege zur yuğaltuğa duçar buldı. Kürenekle tatar cırçısı, Tatarstannıñ atqazanğan, SSSRnıñ xalıq artistı, tatar muzıka sänğäteneñ iñ kürenekle wäkillärennän berse Azat Abbasov 11 üktäberdä 82 yäşendä qatı awırudan soñ wafat buldı. Comğa könne tatar cämäğätçelege märxüm belän opera häm balet teatrı binasında xuşlaştı. Matäm çarasında Tatarstan Prezidentı Mintimer Şäymiev, Däwlät Şurası Räise Färit Möxämmätşin, Premyer-ministrı urınbasarı — Mädäniät ministrı Zilä Välieva, Qazan şähäre merı İlsur Metşin qatnaştı. Üzeneñ çığışında Prezident Azat Abbasovnıñ icatın bäyäläp: “Üze isän çaqta uq aña zur ixtiram, xörmät kürsätelde häm anıñ talantı çın mäğnäsendä moña layıq ide”, - dip belderde. Azat Abbasov Yaña tatar ziratında cirlände. Azat Abbasov 1925 yılnıñ 19 ğinwarında Alabuğada tuğan. Cideellıq mäktäpne tämamlağannan soñ Qazan aviatsiä texnikumına uqırğa kergän. Şunnan soñ Qazan boralaq zavodında konstruktor bulıp eşli başlıy. 1944 yılda Mäskäw konservatoriäse qarşındağı tatar opera studiäsenä uqırğa kergän. Uquın tämäläğäç Qazanğa qayta häm şunnan birle anıñ bay icat yulı Musa Cälil isemendäge Tatar opera häm balet akademiä teatrı belän ayırılğısız bäyle. Azat Abbasov - tatar muzıka sänğäten, bigräk tä anıñ opera tarmağın üsterüdä üzennän zur öleş kertkän şäxes. Operanıñ töp solistlarınnan berse bularaq, teatr spektakl'lärendä yözdän artıq partiä başqardı. Bolar - Ğunonıñ "Faust"ında ul Fawst, Verdinıñ "Riğoletta"sında Gersog, Musgorskiynıñ "Boris Godunov"ında Şuyski, Samozvanes partiäläre änä şundıylardan. Şulay uq Azat Abbasovnıñ tamaşaçılarda zur mäxäbbät qazanğan Näcip Cihanovnıñ “Musa Cälil” operasında Cälil häm Säydäşneñ “Zäñgär şäl” yendä Bulat obrazları tatar teatr sänğäten üsterügä ğayät zur öleş kertte.

XS
SM
MD
LG