Accessibility links

шимбә, 10 декабрь 2016, Казан вакыты 17:54

Bangladesh Möxämmät Yunısnıñ Nobel bülägen qotlıy


Şimbä könne bar Bangladesh xalqı üz millättäşeneñ Nobel Tınıçlıq bülägen aluın bäyräm itä. 30 yıl buyına yarlılarğa kredit birep kilgän Möxämmät Yunısnı qotlaw öçen ul yäşägän yort yanına meñlägän keşe cıyıldı. Yunıs üze bu büläkne fäqirlekkä qarşı köräşendä yaña eträgeç dip qabul itte:

"Bu barıbız öçen dä is kitmäle xäbär, bar Bangladesh öçen. Bez 30 yıl buyı şöğellängän mikrokreditlar sistemı öçen dä. Bezneñ xalıq, yäşlär xıyallarına ireşü öçen küp köç saldı. Häm bu xıyal bügen tormışqa aştı, yarlı keşelärneñ fäqrilektän çığa aluların bar dönya tanıdı" di Nobel büläge iäse.

Comğa könne Nobel komitetı Möxämmät Yunısqa häm anıñ 1976 yılda tözelgän Grameen bankına 2006 yıl Nobel Tınıçlıq bülägen birergä qarar itte. Millionlağan yarlığa fäqirlektän çığarğa yärdäm itkän 66 yäşlek Yunısnı üz ilendä "fäqirlär bankirı" dip yörtälär. Bangladeshnıñ yarlı keşelärenä, bigräk tä xatın-qızlarğa keçkenä kreditlar birep, ul alarğa föqirlektän çığarğa yärdäm itkän.

Bangladesh prezidentı Lacetdin Äxmät bu büläk ilebezneñ dönyadğı abruyın kütärä dip belderde. Bangladesh uramnarında meñlägän keşe bu uñaydan şatlıq belderä:

"Dr.Yunısnıñ Nobel büläge bar xalqıbıznı zurladı. Bez bu abruynı töşermäskä tırışıçaqbız" di Dakadağı eşquar Tariq Xäsän.

"Dr.Yunıs, Grameen bankınnan Nobel büläge aldı, min monıñ belän bik bäxetle" di Kärim isemle yeget.

"Dr.Yunısnıñ Nobel büläge aluı belän min bik ğorurlanam. Bäysezlek alğannan birle bu bezneñ çınlap ta, iñ zur qazanış" di tabip Yäsmin Soltana.

Bügenge Bangladesh matbuğatı Möxämmät Yunısqa zur xörmät belderä. Berläşkän Millätlär general sekretare Kofi Annan Yunıs eşçänlegenä yuğarı bäyä birep, anıñ mikro-finans teoriäsen fäqirlektän çığu öçen näticäle çara dip atadı.

Nobel büläge häm 1 million 360 meñ $ külämendä aqçalata büläk Mäxmmät Yuınsqa häm anıñ Grameen bankına dikäber ayında tapşırılaçaq.

Ali Ğilmi
XS
SM
MD
LG