Accessibility links

җомга, 9 декабрь 2016, Казан вакыты 22:15

Boston Globe: Rusiädä ireklekneñ aqrın üleme


Xökümättän bäysez oyışmalarğa tağın da qırısraq taläplär quyunı häm başqa şuña oxşaş xällärne – könbatış matbuğatı– Rusiädä ireklekneñ aqrın üleme ... dip atıy. 7 üktäber könne üz öyendä atıp üterelgän Anna Politkovskaya – räsmi xakimiät keşese dä, parlament äğzase dä, xattä oppozisiä wäkile dä tügel ide. Amerikada çığuçı Boston Globe yazuınça, küplär öçen – jurnalist xanımnıñ üleme – Rusiädä ireklekneñ betä baruın çağıldırğan ber küreneş bulıp qaldı.

Soñğı yıllarda, Vladimir Putin xakimiäte astında Rusiä mäğlümat çaraları awızlıqlana bara, dip yaza jurnalist Cathy Young. Ämma basım astında da, Politkovskaya – Putin xökümäten täñqitlägän jurnalist bulıp qala aldı. Ul üz mäqälälärendä Çeçnä suğışı, Rusiä xärbiläreneñ wäxşilekläre häm Mäskäwneñ çeçen premyerı Ramzan Qadırovnıñ rejimın yaqlawı turında yaza ide.

Üleme aldınnan da Politkovskaya Qadırov törmälärendäge azaplawlarnı tikşerep şul xaqta Novaya Gazetağa mäğlümatlär äzerlägän bulğan. Üterüçelär tabılır dip ber kem dä ömet itmi. Putin çorında üterelgän ber genä jurnalistnıñ da üleme tikşerelmäde häm cinäyätçelär tabılmadı, dip yaza Boston Globe. Ämma jurnalistnı şaqqatırğanı – üterüçelärneñ tabılmawı tügel. Böten jurnalist cämäğätçelege, xoquq yaqlawçılar häm ğadi xalıq qayğı, borçılu häm qurqu kiçergändä, Politkovskayanıñ cänazasına Rusiä xökümäteneñ ber genä räsmi wäkile dä kilmäde. Üterü turında ber kälimä süz äyter öçen Putinğa berniçä kön kiräk buldı, ul süzlärne dä ul – borçılğan Rusiä xalqı yäki Politkovskayanıñ ğailäse häm xezmättäşläre aldında tügel, ä duslığı şul qadär qadärle bulğan çit illär citäkçeläre aldında äytte, dip yaza Boston Globe. Putin prezident Bushqa cinäyätne tikşerergä süz birde. Politkovskayanıñ 2004nçe yılda çıqqan kitabına küzätü yasağan belgeçlär, jurnalist xanım ber genä sorawğa cawap birmi, di. Putin xakimiättä çaqta Rusiädä yäşäw şul qadär awır bulğaç – ni öçen 2004nçe yılda xalıqnıñ 70%tı anı prezident itep saylağan soñ? digän soraw quya belgeçlär. Häm Boston Globe xäbärçese Cathy Young bu sorawğa üz farazların birä – küplärgä Putinnıñ Rusiä iqtisadına totrıqlılıq kiterüe, qatı qullı buluı oşıy.

Bügenge Rusiä – kommunism çorındağı diktator rejimı tügel- Politkovskayanı soñğı yulğa ozatuçılar, qullarına – "Kreml – çüplek" digän şiğärlär tota alğan ide. Ämma qurqu hawası kire qaytqan. Boston Globe gazetası Rusiädäge ireklek ul – elekke kommunistik totalitar rejim belän yaña millätçe qatı qullı däwlät arasında tar ğına täräzä bulıp qaldı, dip yaza.

Alsu Qormaş
XS
SM
MD
LG