Accessibility links

чәршәмбе, 7 декабрь 2016, Казан вакыты 17:21

Mäskäwdä Xäter köne uzdı


15 üktäberdä milli mädäni üzäktä uzğan xäter köne tarixi mäçet imamı Ramil xäzrätneñ “Yäsin” süräsen uquı belän başlandı.

Häm oçraşuğa kilgän xalıq belän berrättän Qazannı saqlap şähit kitkännär ruxına doğa da uqıldı. Mäskäwdä xäter köne soñğı yıllarda yıl sayın ütkärelep kilä. Mädäni üzäk tatarlarğa qaytarılğan soñğı öç yılda ul inde ğädätkä kerde. Läkin bıyılğı xäter köne başqa yıllılarğa qarağanda xalıqnıñ mädäni üzäkkä bik az sanda kilüe belän ayırılıp tordı. Mädäni üzäk direktorı Änwär Xösäenov, sanap çıqtım, 37 keşe bar ide dip belderde. Xalıqnıñ az buluına üzençä säbäbe dä bulğan. Ber kön aldan cıyılğan milli mädäni möxtäriät äğzäläre, bezgä «orğannardan» xäbär ittelär, mondıy çaranı nigä planğa kerttegez digän sorawlar da birgännär oyıştıruçılarğa. Läkin şulay buluğa qaramastan Xäter köne uzdı. Ul könne çığış yasar öçen bilgelängän Äxmät abıy Galimov ta çığışın «säyäsi kupertülär» yasamasqa kiräk digän süzlärdän başladı. Şuna kürä ul tarixi waqiğalarğa tiränten kermästän çığışın xalıqlar duslığı, tarixi riwayätlärgä nigezläde. Anıñ belen bulğan äñgämädä ul: “Säyäsät üzgärep bara, bezneñ çığışlardan xalıqqa awırlıq kilmäsen ide”, dip belderde.Äxmät Galimovnıñ tel töbendäge, läkin çığışında yañğıramağan tarixi waqiğalar, oçraşuda başqarılğan cırlarda tösmerlände. Nailä Fatixova üzeneñ “Söyembikä” digän cırın başqardı. Şul isemdäge Röstäm Nevretdinov muzıykasına yazılğan başqa cırnı Roza Xabibullina da cırladı ul oçraşuda. Bu aynıñ Ramazan ayı ikänlege dä onıtılmadı Xäter könendä. “Ayqay” törkeme başqaruında Päygambärgä bağışlanğan mönäcätlär tä yañğıradı.

XS
SM
MD
LG