Accessibility links

якшәмбе, 11 декабрь 2016, Казан вакыты 15:03

Rusiädä xökümättän bäysez çit il oyışmalarına terkälü öçen waqıt çığa


18 Üktäber çärşämbe könne Rusiädä eşläwçe xökümättän bäysez çit il oyışmalarına terkälü öçen birelgän waqıt çığa. Distälägän humanitar oyışma wäkilläre xäzer qäğäz eşläre belän çaba. Şuşı köngä qädär terkälep ölgermäsälär, yä isä ğarizaları kire qağılsa, alar Rusiädä eşçänlegen tuqtatırğa mäcbür bulaçaq.

Meditsina ölkäsendä eşläwçe Medicines du Monde isemle Fransiä oyışmasınıñ Mäskäwdäge bülegendä bu könnärdä Parijdan möhim dokumetlar kötep utıralar. Bülek başlığı İsmail Şihab Äl-Din alarnı inde bulğan ber qoçaq dokumentlarğa quşıp çärşämbe 18 Üktäber könne Rusiäneñ Federal Terkäw xezmätenä iltep ölgerergä cıyına:

"Bik küp dokument cıyarğa kiräk ide, nigez saluçılarnıñ pasport nomerlarına qädär. Terkäw xezmäte atnasına ber kön eşli – çärşämbe. İxtimal, bu könne bik küp keşe bulır. Tañ atu belän barası bulır. Älbättä, küpmeder waqıtqa eşne qaldırıp torırğa turı kiläçäk" di oyışma citäkçese.

Rusiädä eşläwçe başqa xökümättän bäysez çit il oyımaları kebek ük, Şihab Äl-Din dä soñğı atnaların dokument tuplap ütkärde. Taläp itelgän dokumentlar isemlege şaqtıy zur. Oyışmağa nigez saluçı äğzalarınıñ pasport nomerı, adreslarınnan tış, oyışmanıñ nizamnamäse Rusiädä eşlärgä röxsät itkänne raslağan dokumentlar da kiräk.

Amerikan Säwdä Pulatı, üze terkälüdän tış, başqa oyışmalarğa kiñäşlär dä birä. Pulat citäkçese Andrew Somers süzlärençä, monıñ işe dokumetlarnı tuplaw keçkenä oyışmalarğa bigräk tä awır. Eşne ciñeläytü öçen alar Terkäw xezmäte räsmiläre belän oçraşular ütkärgän. Bu niqädär yärdäm itkänder, xezmät başlığı urınbasarı Anatoli Pançenko süzlärençä, dokumetlarda, urıs telenä tärcemälärdä xatalar bik küp.

Xökümättän bäysez çit il oyışmaların terkäw turındağı qanun yıl başında qabul itelgän ide. Yün ayında Rusiä xökümäte terkäw taläplären iğlan itte. Dokumentlarnı tuplaw öçen oyışmalarğa waqıt az qaldı.

Washingtonda urnaşqan Heritage Foundation isemle abruylı oyışmanıñ Mäskäw bülege citäkçese Yevgeny Volk süzlärençä, alar 200 bittän torğan dokumentlar tapşırğan. Başqa oyışıma citäkçeläre kebek ul da bu qanun yärdämendä Rusiä xökümäte üzenä oşamağan oyışmalarnı yabıp quya alaçaq dip sanıy:

"Säyäsi yaqtan bu cit il oyımaların Rusiädän qısıp çığaru ğämäle. Ägär sezgä oşamıy ikän, çığıp kitegez, dip açıqtan-açıq äytelde. Yağni bu oyışmalarnıñ buluı berkemgä dä kiräk tügel" di Heritage Foundation oyışmasınıñ Mäskäw bülege citäkçese.

Rusiädä barlığı 500-läp xökümättän bäysez çit il oyımalası eşli dip sanala. 12 Üktäbergä şularnıñ ni barı 80-ne terkälgän ide. Terkäw xezmäte räsmiläre äytüençä, tağın 70 ğariza tikşerüdä yata.

Düşämbedä Yustitsiä Ministrlığı räsmie Natalia Vişnyakova şuşı wazğiätkä añlatma birde. Anıñ süzlärençä, 18-nä qädär tekälep ölgermägän oyımalar, beterelä digän süz tügel, alar yuridik zat bulıp qalaçaq, fäqät 19-ınnan başlap eşçänlegen tuqtatırğa tieş bulaçaq. Vişnyakova äytüenä qarağanda, alar terkälüne soñraq ta ütä alaçaq.

Ali Ğilmi
XS
SM
MD
LG