Accessibility links

җомга, 9 декабрь 2016, Казан вакыты 12:45

Yıraq könçığış üseştäme, ällä xalıqnıñ xäle möşkelme?


Rusiä federatsiäse prezidentınıñ Yıraq könçığış federal' okrug wäkälätle wäkile Kamil İsxaqovnıñ “İnterfaks” agentlığında uzdırğan matbuğat oçraşuı şulay dip ataldı. Kamil İsxaqov jurnalistlar belän oçraşuın “bezdä çişelmägän mäs'älälär bik küp, alar turında söylärgä waqıt citmäs, sorawlar ğına biregez”, dip başladı. Jurnalistlarnı yıraq könçığışta möhacirlek mäs’äläsen çişü dä, xalıqnı toraq belän tä'min itü dä, yullar tözeleşe dä, xökümätneñ sälämätlek häm mäğärif yağınnan milli proyektnı tormışqa aşıru da investitsiälärne cälep itü dä, xalıqnıñ yäşäyeşe dä qızıqsındırdı. Kamil İsxaqov xalıq bik awır yäşi dide. Anıñ matbuğat oçraşuına ber kärzinkä azıq tölek kütärep kilüe dä qızıq bulıp toyıldı jurnalistlarğa. Kamil İsxaqov min bu rizıqlarnı yıraq könçığıştan alıp kilmädem, bez bolarnı Mäskäw kibetlärennän aldıq. Menä xäzer sezneñ qarşıda bäyälärne çağıştırasım kilä dip, Yıraq könçığışta iñ kiräkle rizıqlarnıñ 3-4 xatta biş märtäbä qimmät ikänlegen isbatladı. Ber buxanka qara ipi dimäk, 29 rubl'dän artıq, ä inde ber distä yomırqa yıraq könçığışta 87 rubl' tora ikän. Azıq tölekne citeşterü mömkinlekläre yuq däräcäsendä, şunıñ öçen Yıraq könçığış çit ildän kertelgän azıq tölekkä bäyle, dide Kamil İsxaqov. Yıraq könçığışnı üzläştereü öçen xalıqnı ul taraflarğa küçerü proyektı barlığı da mäğlüm. Läkin Kamil İsxaqov kilüçelär bulsa da, Yıraq könçığıştan soñğı 15 yılda ğına yıl sayın 20% xalıq Yevropa öleşenä küçep kitä, dide. Yıraq könçığışta xezmät xaqına östäp birelä torğan koeffitsientlar saqlansa da, ul küpçelek waqıtta byudjet ölkäsendä eşläwçelärgä genä qağıla, dide ul. Şul uq waqıtta ul Yıraq könçığışta küp törle qazılma baylıqlar bik küp. Läkin alarnı üzläşterü öçen mömkinleklär tudırırğa kiräk bulaçaq, bez anıñ östendä eşlibez, dide Kamil İsxaqov. Bezneñ millättäşlärneñ yıraq könçığışta da küpläp yäşäwen iskä alıp, kamil İsxaqovtan alrağa nindi bulsa da yärdäm kürsätä alğanığız barmı, küreşäsezme digän sorawğa Kamil İsxaqov här töbäktä bulğan sayın alarnı cıyarğa tırışam. Küptän tügel genä festival' ütkärdek. Anda da tatarlar qatnaştı. Xäzer Yıraq könçığışta Tatarstan televidenie häm radiosın tıñlaw, qararı mömkinleklären dä buldırdıq, dide ul.

“Töbäklärne ber-bersenä quşıp ereländerü proyektına niçek qarıysız? Xäzer inde bu mäs’äläne çişkändä referendumnar ütkärep tormasqa, xalıq fikere kiräk tügel, cirle parlamentlar qararı da citkän, digän fikerlär yöri”, digän sorawğa Kamil İsxaqov: “Xalıqtan hiç kenä dä ayırılırğa yaramıy. Bez dä şul xalıqtan çıqqan keşelär bit. Yuğarığa kütäreldek digäç tä kem buldıq ul qädär, xalıq belän kiñäşep eşlärgä kiräk”, dide. Ä inde Tatarstannı berär töbäk belän quşıp quymaslar mikän digän sorawğa ul “Alla saqlasın!” dip cawap birde.

Näzifä Kärimova. Mäskäw

XS
SM
MD
LG