Accessibility links

пәнҗешәмбе, 8 декабрь 2016, Казан вакыты 21:11

Tatarstan dönya buylap maqtanırğa çığa


Tatarstan belän Rusiä arasında torğınlıq çorın xäterlätkän, respublikanı sawım sıyırı itep kenä kürgän mönäsäbätlär bulsa da, tatar ile çit illär belän mönäsäbätläre çın kapitalistlarça qorıp yata. Rusiä byudjetına millionnar ağa. Nifettän kergän faydanıñ 80 protsentı Mäskäwgä kitä. Bu räsmi san. Ä bit yäşärgä, respublikanı alğa alıp barırğa kiräk. Bu oçraqta inde, kapitalizmda yäşäp yatqan dönya illäre qanunnarına buysınasıñ. Şuşı qanunnarnıñ berse, ul investitsiä häm çit illär belän urtaq xezmättäşlek. Rusiäneñ ber töbäge sanalğan Tatarstannı çit illärdä belep betermilär bit. Şuña kürä, Tatarstan türäläre xäzer, törle illärdä Tatarstannı tanıtu yulın sayladı.

Soñğı waqıtlarda Tatarstan türäläre şiğärlär uylap çığaru belän mäşğül. Ä şiğär artında konkret eş yata dip ışandıralar. Menä, bıltır, Mintimer abıy Şäymiev, Qazan meñ yıllığı waqıtında Buldırabız digän şiğär äytte. Xäzer, bu tatar milli ideyäse däräcäsendä yörtelä. Monısı, üz ğorurlığıbıznı arttıru maqsatında dip añlarğa kiräk möğayın. Ä menä çit illärgä xäzer çaqıru da şiğär-lozung kebegräk yañğırıy. Tatarstanğa räxim itegez!! Bu duslar, mäktäp işeklärendäge pafoslı sälämläw genä tügel. Bu şiğär-çaqıru artında aqça eşläw yata. Tiennär tügel, milliardlar. Tatarstan türäläre aqçanı taba da, urnaştıra da belä ul. Ex, ägär Mäskäw abzıy da yaqalarnı beraz buşatsa, çäçäk atar ide bu tatar ile dip xıyallanalar bit alar. Ä älegä Mäskäw abzıy yaqadan qatı tota, şuña, aqçanı çittän ezli respublika räsmiläre. İnvestitsiä dip atala ul xäzer. Respublika iqtisadıy potensialı belän qızıqtırıp, monda burjuy kapitalistlarnı kiterü. Üzlärenä monda ällä ni ixtıac yuq, aqçaları kiräk. Menä xäzer, Respublika, küçmä povil'on belän dönya buylap säyäxätkä çığa. Berençe tuqtalış bu könnärdä Londonda. Tomanlı Al'bionnı Tatarstan belän tanıştıru. Küptän tügel genä razvedkağa anda Kamal teatrı barıp qayttı. Xalıq yılıy-yılıy tatar spektakl'lären qarağan dilär. Xäzer, şundıy yuğarı mädäniätkä iä bulğan respublika, Londonğa nifet, ximiä sänäğäteneñ , maşina tözeleş. Ğomumän, respublikanıñ baylığın nästä totıp tora- şunı alıp baralar. Andağı burjuylarnı, bez menä bay. Läkin, baylar üzara aralaşıp, satu-säwdä yasap tağı çeri ala digänräk imidj yasaw. Xezmättäşlek inde, qısqası. 19-20 üktäberdä bulır dip kötelä bu xäl. Mintimer Şäymiev üze dä baraçaq anda. Monnan tış, Rusiä premyer ministrı kiñäşçese Aleksandr Jukov, Tatarstannıñ ministrları, şirkät- zavod direktorları bulaçaq bu säfärdä. Programması bilgele inde. Bik faydaplı säfär itep tözelgän. Ä bu Respublikanı Londonda täqdim itü Radisson Edwardian May Fair digän danlıqlı qunaqxanädä bulaçaq. Säfär turında aldağı tapşırularda da xäbärlär bulmıy qalmas. Menä şunıñ belän şul.

Räfis Cämdixan

XS
SM
MD
LG