Accessibility links

шимбә, 10 декабрь 2016, Казан вакыты 00:18

New Yorkta Anna Politkovskayanı iskä aldılar


Rusiädä üterelgän jurnalist Anna Politkovskayanı düşämbe könne New Yorkta da iskä aldılar. Politkovskaya könbatışta Rusiädäge iñ täesirle jurnalistlarnıñ berse sanala, anıñ yazmaları Çeçnädäge xällär turında tögäl xisap bularaq qabul itelä ide. Quşma Ştatlarda sovet diplomatları ğailäsendä tuğan Politkovskayanıñ AQŞ universitetlarındağı çığışları bik zur qızıqsınu cälep itä ide.

New Yorkta ütkän bu iskä alu çarası Politkovskaya üterelgänneñ tuğısınçı könenä turı kiterelde. Ruslarda bu könne keşeneñ ruxı cäsädennän ayırıla dip sanala.

İskä alu Çıdamlıqqa Öyrätü Xalıqara Üzägendä ütte. Bu könnärdä anda Politkovskaya mäqäläläreneñ iğtibar üzägendä bulğan Çeçnä turında fotokürgäzmä eşli

Xalıqara xoquq yaqlaw oyışması Human Rights Watchnıñ başqarma mödire Rachel Denber İnguşetiädä Politkovskaya belän bergä eşlägän üz xezmätkärläre söylägännärne iskä aldı.

"Qaçaqlar lagerında nindider canlanu bulğan häm minem xezmättäşem ni bulğanın añlap citkermägän. Şulçaq qaçaqlar arasında dulqınlanu başlanğan häm ul kilde, ul kilde digännär. Anna Politkovskaya kilgän bulğan. Bu bäyräm sıman, rok yoldızın kilüe sıman qabul itelgän. Bu anıñ möläyemlege, tanılğan buluı belän bäyle tügel. Ä Politkovskayanıñ alar belgän, üz xällären aña söyläp bulaçağın belgän, alarnı tıñlıy torğan, alarğa küz yommıy torğan, alarnı yalğançı dip atamıy torğan keşe buluı belän bäyle. Şuña kürä ul alar öçen rok yoldızı kebek bulğan" di Denber.

Quşma Ştatlardağı xökümättän bäysez Çeçnäne Yaqlaw Çeltäre isemle oyışma wäkile Almut Rochowanski Politkovskayanıñ yazmaları Könbatış uquçılarında bik ciñel qabul itelä ide, anıñ yazmaları Quşma Ştatlardağı küp kenä studentlar öçen faydalı buldı di.

"Ul qalğan Rus jurnalistlarınnan şaqtıy ayırıla ide. Bügenge genä tügel ğömümän alğanda. Ul bik turıdan, faktlar belän yaza ide. Könbatış uquçıları anı bik äybät qabul itä ide. Anıñ yazmalarınnan torğan ingliz telendäge kitaplarda anıñ mäqäläläreneñ tärcemäse birelä. Bik borğalanuçan, isemnärne, faktlarnı atamıy ğına ber närsädän ikençesenä küçüçän rus jurnalistikasınnan ayırmalı bularaq ul çınnan da bik turıdan äytep, açıq kürsätep yaza ide. Bu härkemgä oşıy. Häm AQŞtağı küp kenä yäşlär berençe çiratta näq menä anıñ kitapları säbäple Çeçnä belän qızıqsına başladı" di Rochowanski.

Rochawanski äytüençä, Çeçnäne Yaqlaw Çeltäre xäzer Politkovskya isemendäge stipendiä yäki waqıf buldıru mäsäläsen qarıy.

Naif Aqmal, Praga.
XS
SM
MD
LG