Accessibility links

Кайнар хәбәр

Narkomaniä belän köräşüçelär Qazanda cıyıldı


Küptän tügel qoş kizüe dip şawladı dönya. Bu awırudan berniçä distä keşe dönya quydı. Ä narkomaniä yıl sayın meñnärçä keşeneñ ğömeren özä. Döres, soñğı yıllarda äf'yun qullanuçılar sanı şaqtıy kimede. Şulay da bik zur üseş tempları sizelmäsä dä, daimi räweştä narkomannar sanı artıp kilä. Ä narkotiknı çamadan tış qullanudan ülem isä bik nıq artqan.

Dönyada bügen 200mln. narkoman yäşi. Alarnıñ kübese 20дән alıp 39 yäşkä qadärge keşelär. İñ küp äf'yun citeşterüçe töbäk bulıp Äfganstan sanala. Soñğı berniçä yılda anda äf'yun citeşterü xätta 57%qa artqan. Narkomaniä belän barlıq illär dä üzençä köräş alıp bara. Ämma anı berkem dä ciñä almıy, ciñü genä tügel, çınlap ta effektiv köräş ısulların da taba almıy älegä. Xastaxanädä däwalaw näticäsendä 7-15% oçraqta ğına narkoman terelä. Däwalaw oyışmalarınnan terelep çığuçılar bälki kübräkter dä, ämma yänä äf'yungä qaytmawçılar az. Şuña kürä elekke narkomannar yuq digän äytem dä bar. Şunlıqtan bu problema belän köräşüdä profilaktik çaralar bik möhim urın ala. Yäğni narkomaniä belän böten cämğiät köräşergä tieş. Ğailädän başlap, annarı mäktäptä dä häm ixtıäc tusa, tabiplar yärdäme belän dä.

Şuşı xaqta çärşämbe könne Qazanda açılğan 5нче töbäqara fänni-ğamäli kiñäşmädä dä süz bardı. “Cämğiät äf'yungä qarşı” dip atalğan älege kiñäşmä Qazannıñ milli-mädäni üzägendä ütte. Anda Rusiäneñ küp kenä töbäklärennän kilgän belgeçlär qatnaştı. Alay ğına tügel anda Şvetsiädän “Äf'yungä qarşı Yevropa şähärläre” digän xalıqara oyışmanıñ wäkile dä kilgän ide. Töbäqara kiñäşmäne respublika premyer-ministrı - mädäniät ministrı Z.Wälieva alıp bardı.

Kiñäşmädä narkomaniä belän köräşüdä böten cämğiätneñ role zur buluına tağın ber qat basım yasaldı. Älege zur çaranıñ Tatarstanda oyıştırıluı yuqqa tügel. Narkomaniä belän köräşüdä respublika aldınğı urınnarda tora. Soñğı biş yılda Tatarstanda narkotik qullanuçılar sanı 6 tapqırğa kimegän. Yäşüsmerlär arasında isä xätta - 10 tapqırğa. Mondıy uñışqa ireşergä respublikada berniçä yıl däwamında ğämäldä torğan maxsus programmalar yärdäm itkän. Älege programmalarğa 450mln sum aqça bülengän. Qayber keşelär narkomannarnı däwalawğa mondıy zur aqçalarnıñ bülenüenä qänäğätsezlek belderä. Alar sälätle sälämät yäşlärgä dä bik küp tapqırğa azraq aqça birelä di. Ämma alda äytelgän summa däwalawğa ğına tügel, ul ğomumän bu afät belän köräşü öçen birelgän. Narkomaniä afäte isä ber dä yıraq tügel. Bu qayğınıñ här öygä dä ütep kerü qurqınıçı bar. Qurqınıç bulmasın öçen ğailä, uqu yortları, citäkçelär, xoquq yaqlaw orğannarı berläşep ber maqsat öçen eşlärgä tieş.

Al'bina Zäynulla

XS
SM
MD
LG