Accessibility links

шимбә, 10 декабрь 2016, Казан вакыты 04:10

Sverdlovski Ölkä Dumasına tağın ber tatar deputatı saylandı


Küptän tügel Sverdlovski ölkäsendä Ölkä Dumasına bulıp uzğan saylawlarnı räsmi yomğaqlaw bulıp uzdı. Älege saylawlar ölkädä yäşäwçe tatarlar tormışına turıdan-turı yoğıntı yasadı, disäñ dä yalğış bulmas. Saylawda qatnaşu öçen terkälgän un firqä isemlegendäge 140 kandidatnıñ barı tik berse genä tatar keşese buldı, häm ul Rossiä Tormış firqäse isemlegendä öçençe urında, yäğni “ütä torğan” urında ide. Aldınğı tatar köçläre, bilgele inde, forsattan faydalanıp qalıp, üz tatar keşesen Dumağa uzdıru öçen tırıştılar. Qarşılıqlar, kirtälär küp buldı, xätta yuq-bar säbäplär tabıp, saylaw aldınnan Tormış firqäsen terkäwdän dä baş tarttılar. Eş Yuğarı Sudqa, Mäskäwgä xätle barıp citte. Yuğarı Sud uñay qarar qabul itep, Tormış firqäsen terkägänçe, saylaw aldı kampaniäseneñ nibarı yartı ay ğına waqıtı qalğan ide. Şuña qaramastan, Sverdlovski ölkäse tatarları üz teläklärenä ireştelär. Rossiä Tormış firqäseneñ Sverdlovski ölkäse bülege, 11,5 protsent tawış alıp, ölkä Dumasında ike urın aldı. Şulay itep, tatar eşmäkäre, Yekaterinburg şähärendä eşläp kilgän Milli media-xoldingnı ğämälgä quyuçı Rinat Sadriev deputat mandatına layıq buldı.

Aldınğı tatar cämäğätçelege fikerençä, tınğısız, eşlekle xolıqlı Rinat äfändeneñ deputat bulıp saylanuı ölkä tatarları öçen bik uñay küreneş. Ul Sverdlovski ölkä Dumasına saylanğan dürtençe tatar deputatı. Yekaterinburg şähär Dumasında 5 tatar deputatı eşli. Alarnıñ qayberäwläre çın tatar tormışına yaña ğına kerä başladı äle. Ä inde soñğı altı yıl buyına Sverdlovski ölkä tatarlarınıñ milli tormışına bertuqtawsız yärdäm kürsätep toruçı Rinat Sadriev tatar deputatları korpusın tağın da köçäyter häm tatar milli tormışı uñay yaqqa üseş alır digän ömet zur.

Fäwiä Safiullina,Yekaterinburg

XS
SM
MD
LG