Accessibility links

якшәмбе, 11 декабрь 2016, Казан вакыты 11:11

Mädäniät qaysı yuldan kitär?


Berkemgä dä ser tügel, mädäniät ölkäsenä byudjettan aqça bik az häm iñ soñğı, başqa ölkälärdän qalğanı ğına bülep birelä. Älege däwlät yärdäme mädäniät oyışmalarınıñ ştatların häm binaların asrawğa ğına citä. Ä mädäniät häm ul cämğiätkä birä torğan ruxi baylıqlarnı berkem dä sanap, küzätep tormıy. Xäzergä mädäniät Rusiädä tormışqa aşırıla torğan 4 däwlätküläm proyekt isemlegenä dä kertelmägän. Mäğärif, sälämätlek saqlaw kebek tarmaqlar belän berrättän mädäniätkä dä yärdäm itmägändä milli problemalar tağın da kiskenläşergä mömkin di mädäniät belgeçläre. Niçek kenä bulmasın xäzergä buş häm salqın kitapxanälärdä, keşe az yöri torğan muzeylarda çamadan tış az xezmät xaqı aluçı zıyalı xezmätkärlär cämğiätneñ ruxi tormışın bayıta almıy ğazaplana.

Menä şuşı xälne üzgärtü öçen Tatarstan Mädäniät ministrlığı tarafınnan häm Mäskäwneñ Mädäniät säyäsäte institutı belän berlektä mädäniät häm sänğät xezmätkärläre öçen “Mädäniät ölkäsendä yaña strategiälär” dip atalğan belem birü seminarın uzdırıla.

Dürt kön däwamında seminarda mädäniät belgeçläre xäzerge zamanda mädäni säyäsät, mädäniät oyışmaları eşçänlege, mädäniät iqtisatı, mädäniät häm biznes, icadi industriälär digän temalarğa fiker alışaçaq.

Älege uqu seminarları turında Mädäniät ministrlığınıñ sotsial'-mädäni bülek mödire Gölşat Nigmatullina söyli.

“Bezneñ bu oyıştırılğan seminar berençe tapqır respublika külämendä uzdırıla. Bügenge köndä mädäniät üseşen küzdä totıp, bezneñ xezmätkärlärne, ğomumän alğanda mädäniät uçaqları citäkçelärenä yaña etärgeç birergä, alarğa yaña yünäleş birü maqsatınnan bu seminarnı bez oyıştırırğa buldıq. Küpme qarıysıñ inde remontlar yasattıq, mädäniät uçaqlarınıñ yañaça qorılğan cihazları bar, ämma keşelär belän aralaşuda yaña çaralar tabu citäkçelärneñ üzlärennän tora, qayberläre bügenge köndä bik sülpän eşlilär. Bez bik ozaq kiñäşkännär soñ, älege seminarnı alıp barırğa dip bez Mäskäwdän Mädäniät säyäsäte institutınnan belgeçlär çaqırdıq. Seminarda mädäniät üseşeneñ yaña alımnarı, yaña formalar qullanıp mädäniätne cämğiätkä citkerü turında suz baraçaq. Qatnaşuçılar arasında respublika küläsendä sänğät häm mädäniät bülekläre citäkçeläre häm dä däwlät qaramağında bulmağan oyışmalar da qatnaşa. Ğomumän bezneñ töp yünäleş xalıqqa xezmät itü. Häm bügen sotsial'-ekonomik şartlarda mädäniätneñ üz urının tabarğa, üz yünäleşen açıqlarğa kiräk. Şunıñ öçen bezgä möhim üzebezneñ yulnı saylap, bu yulnı bezneñ citäkçelärgä añlatıp tormışqa aşırırğa kiräk.”

Menä şulay itep, Rusiä kapitalizm çorına kergäç, yätim qalğan mädäniät tarmağına can kertü turında uylap Qazanda dürt kön däwamında Mädäniät xezmätkärläre fiker alışaçaq. Anda yasalğan näticälär turında kiläse tapşırularıbızda söylärbez.

Gölnaz Şäyxetdin

XS
SM
MD
LG