Accessibility links

якшәмбе, 11 декабрь 2016, Казан вакыты 01:25

"Bezneñ Ukraina" yaña säyäsi adım yasadı


"Bezneñ Ukraina" blogı xakimiättäge koalisiäneñ säyäsätenä qarşılıq yözennän üzeneñ ministrların xökümät eşennän aluın xäbär itte. 2004nçe yılğı äflisün inqilabınnan soñ tarqalğan xezmättäşlek – süz Yulia Tymoşenko blogı turında bara - yañadan kiräk bulır digän farazlar bar. "Bezneñ Ukraina" köçläreneñ bu adımı – prezident Viktor Yuçenko däräcäsenä dä tiskäre täsir itä ala.

Yuğarı Radada Bezneñ Ukraina citäkçese Roman Bezsmertny, 17 üktäber könne, koalisiädäge – regionnar partiäse, sosialist häm kommunist firqalärenä bulğan däğwaların atap çığış yasadı:

"Soñğı 2 ayda Ukraina xalqı saylağan prezident Viktor Yuçenko alıp barğan eçke häm tışqı säyäsättä ber nindi alğa kiteş küzätelmäde. Dönya Säwdä Üzägenä kerü eşläre körçekkä terälde, Ukraina belän Yevropa Berlege arasındağı xezmättäşlek tuqtatıldı."

Bezsmertny, Radada bulğan häm Rada eşendä qatnaşmağan oppozisiädäge firqalärne, berläşergä häm Yuçenko säyäsäten yaqlarğa çaqırdı:

"Bügenge wazğiätne çişü yulı itep bez Yevropa Ukrainası konfederasiäse digän oppozisiä berlege tözergä çaqırabız. Berlek, krizisqa qarşı koalisiä häm xäzerge xökümättän ayırmalı bularaq, başqa törle çaralar planı töziäçäk."

Yulia Tymoşenko blogı turında Bezneñ Ukraina yulbaşçısı ber süz dä äytmäde. Bu ike blok äflisün inqilabı waqıtında xezmättäşlek itep, soñınnan koalisiä tözi almağaç 2005nçe yılnıñ sintäber ayında ayırılğan ide. Tymoşenko blogı uzğan ayda Yuğarı Radada üzeneñ oppozision berlegen tözep, anıñ citäkçese itep Tymoşenkonı üzen iğlan itkän ide.

Ul arada Tymoşenko blogı wäkile Anatoly Semynoha, Azatlıq radiosınıñ ukrain redaksiäsenä, "Bezneñ Ukraina" belän xezmättäşlekne yañartırğa qarşı bulmawların belderde:

"Bezneñ pozisiäbez bilgele. Bez oppozision fraksiälär berlegen tözedek, bezgä qayber sosialistlar quşıldı. Şulay uq "Bezneñ Ukrainanı" çaqırabız. Minemçä, alarğa yaña berleklär uylap tormasqa, bezgä quşılırğa ğına kiräk."

Bezneñ Ukrainada äle bu xaqta berdäm fiker yuq. Şuşı säyäsi tärräqiättä prezident Yuçenkonıñ urını qayda soñ?

Xökümättän kitkän 5 ministrnıñ urının premyer-ministr Viktor Yanukoviç keşeläre alırğa mömkin. Ğinwar ayında Yanukoviç tarafınnan äzerlänep tormışqa aşırılğan konstitusiä reformasınnan soñ prezidentnıñ wäkälätläre kimede, premyer-ministrnıqı arttı. Küptän tügel Yanukoviç Yuçenkonıñ qayber qararların ütäwdän baş tarttı. Prezidentnıñ, xökümät belän kiñäñläşmiçä, töbäklär citäkçelären bilgeläw xoquqı xäzer Konstitusiä mäxkämäsendä qarala.

Prezident saylawları Ukrainada 2009nçı yılda, parlamentqa tawış birü – 2011nçe yılğa bilgelängän.

Alsu Qormaş
XS
SM
MD
LG