Accessibility links

җомга, 9 декабрь 2016, Казан вакыты 20:34

Gruziä Yewropanıñ Rusiägä basımı däwam itär dip ömetlänä


Gruziädä Rusiäneñ 4 küzläw ofitserı qulğa alınğannan soñ Rusiä belän Gruziä arasındağı kierenkelek tağın da artıp kitte. Bu könnärdä Waşingtonda Gruziä parlamentı deputatları Giga Bokeria belän Nika Rurua Azatlıq xäbärçese belän oçraşıp ike il arasındağı mönäsäbätlär, Yewropa Berlegeneñ Rusiägä ğämällären tänqitläwe, Mäskäwneñ Gruziägä qarşı iqtisadıy çikläwläre häm Abxaziä belän Könyaq Osetiäneñ Gruziädän ayırılıu omtılışları turında söyläde.

AZATLIQ: Sişämbe könne Luksemburgta Yewropa Berlege tışqı eşlär ministrlarınıñ belderüennän sez qänäğätme?

BOKERIA: Älbättä beraz soñarudan soñ Yewropa Berlegennän açıq reaksiä buluğa biz şatbız. Bez bu äle reaksiäneñ axırı bulırğa tieş tügel dip uylıybız. Rusiäneñ Gruziägä qarata mönäsäbätendä çın üzgäreşlär bulğançığa qädär bu reaksiä däwam itärgä tieş dip uylıym. Ämma başlanğıç öçen bu äybät belderü buldı.

RURUA: Minemçä, bu xäldä Gruziä bulğan problemalarnı kürsätüçe bertörle etärgeç buldı. Moñarçı telgä alınmağan problemalarnı. Häm bu yaxşı başlanğıç. Sez äytkän belderü berençe adım ğına buldı. Min anıñ däwamı bulır dip ömetlänäm.

AZATLIQ: Gruziä Könbatıştan mömkin bulğan qädär yardämne ala dip uylıysızmı?

BOKERIA: Äytkänemçä, Gruziä sivilizatsiäle dönyanıñ, irekle dönyanıñ Rusiä belän bu mäsälädä ezlekle buluına ömetlänä. Yewropa Berlegeneñ şul uq ruxta däwam itüe Gruziä öçen dä Rusiä öçen dä häm böten Yewropa öçen dä bik möhim dip uylıybız.

RURUA: Xäzerge wäzğiät problemalarnıñ Gruziä belän Rusiä arasında ğına tügellegen kürsätä. Könbatış xäzer bu problema Rusiäneñ häm Könbatınıñ yulları, yünäleşläre arasında bulğanlığın kürer häm añlar dip ömetlänäm. Gruziä äytkänemçä zurraq küreneşneñ ber öleşe genä. Könbatışnıñ bu ğämälläre däwam itär dip ömetlänäm. Çönki bu çın säyäsät, çın pragmatik ğämällär yañadan qaralırğa mömkin çaq. Häm xäzer qayber prinsiplarnı, ideallarnı yaqlaw zarur. Bu qayber ozaq ğömerle idellar öçen sınalır çaq. Häm ul ideallar çınnan da ni bulsa añlata ikän, alar Gruziädä bik tä konkret närsälärne añlatırğa tieş.

AZATLIQ: Abxaz parlamentı çärşämbe könne Russiägä Abxaziäne bäysez däwlät bularaq tanunı sorap möräcäğät itte. Könyaq Osetiä isä 12-nçe noyäberdä bäysezlek rederendumı ütkärä. Gruziä moña niçek cawap biräçäk häm ul ayırılrğa teläwçe ölkälärdä sez köç qullanunı yaqlıyaçaq wäzğiät bula alamı?

BOKERIA: Berençedän, Abxaziädä yäşägän 300 meñnän artıq görci üz öylärennän kitärgä mäcbür itelde häm alarğa kire qaytu mömkinlege birelmi. Ägär dä Abxaziäneñ bäysezlege ürnäk bularaq tormışqa aşsa, bu böten dönya öçen qurqınıç bulaçaq. Bu kitärgä mäcbür bulğannarğa qarata bik zur ğädelsezlek kenä bulıp qalmıyaçaq, bu dönyanıñ teläsä qaysı öleşendä çittän yardäm alğan azçılıqnıñ köç belän milli çistartular ütkärä aluın häm annan soñ üzbilgelänä aluın añlata. Bu bik tä qurqınıç.

Bez ike nizağqa da säyäsi çişeleş tabu yaqlı. Bez bu yünäleştä buldıra alğan qädär tırışabız häm tırışaçaqbız. Bez ike nizağ öçen dä tınıçlıq planı häm tınıçlıq xaritası äzerlädek. Bez tüzemsez tügel. Bez döres yünäleştän aqrınlap ämma nıqlı barırğa telibez. Ämma älegä ikençe yaqtan bernindi reaksiä dä bulmadı. Gruziä beryaqlı ğına adımnar yasıy, ämma älegä cawap yuq. İkençe yaqtan, bezneñ abxaz yäki osetin watandaşlarıbız yuq. Abxaziä parlamentı digän närsä qararlarında, yäki Tsxinvali töbäge referendumında alarnıñ öleşe yuq. Anda de facto Mäskäw qaramağındağı xakimiätlär eşli.
XS
SM
MD
LG