Accessibility links

җомга, 9 декабрь 2016, Казан вакыты 16:46

Xoquq yaqlaw oyışmasın yabarğa telilär


Başqortstanda soñğı könnärdä keşe xoquqların yaqlawçı “Xalıqara standart” dip isemlängän fond tiräsendä cäncal qubıp tora. 18 üktäber könne bu oyışma wäkilläre Federal' terkäw xezmäteneñ Başqortstan idäräsennän “Xalıqara standart” oyışmasınıñ yabılaçağı xaqında däğwä belderüe alğan. Nindi ğäyeplär tağıla soñ bu oyışmağa? Federal' terkäw xezmäteneñ töbäk bülege däğwäsında bu xälne älege keşe xoquqların yaqlawçı fondnıñ tieşle terkäw ütmäwe häm salım xisabın birü tärtiben bozu belän añlatqannar.

Ämma “Xalıqara standart” fondınıñ Ufadağı wäkile Konstantin Potnin bu däğwälarnı kisken kire qağa. “Bu bezneñ oyışmanı yabıp quyu öçen uylap çığarılğan säbäplär genä, - dip belderä ul. – Bez moñarçı oyışmabızğa qarata Terkäw xezmäte tarafınnan administrativ xoquq bozular xaqında bernindi dä kisätülär alğanıbız bulmadı. Terkäw xezmätenä dä, Salım oyışmalarına da taläp itelgän hämmä dokumentlarnı häm xisaplarnı waqıtında birep bardıq”.

Konstantin Potnin äytüençä, “Xalıqara standart” fondına qarata başlanğan törle tikşerülärne häm çoqçınularnı maxsus başlanğan köçle höcüm dip atarğa bula. “Keşe xoquqların yaqlaw buyınça alıp barğan eşçänlegebez respublikadağı qayber namussız türälärgä oşap betmi, şuña kürä dä bezne yabıp quyarğa mataşalar”, - di Konstantin Potnin.

Ufadağı “Xalıqara standart” dip ataluçı keşe xoquqların yaqlaw fondı wäkile Konstantin Potnin üzlärenä qarata Salım oyışmaları häm Terkäw xezmäte tarafınnan bulğan däğwälarnı barmaqtan suırıp çığarılğan uydırmalar dip atıy. Soñğı biş ayda ğına da bu fondnı başta Salım oyışması, annan soñ prokuratura, häm menä inde Yustitsiä ministrlığı wäkilläre tikşerä ikän. “Bu kemneñder quşuı buyınça eşlänä torğan aldan uylanılğan höcüm, - di Potnin äfände. – Bezneñ tapşırğan xisaplarnı häm dokumentlarnı almadıq dip äytüläre ğäcäpländerä”.

“Keşe xoquqların yaqlawçı “Xalıqara standart” dip atalğan fondnıñ Başqortstandağı bülege biredä 1999 yıldan birle ük eşli, - di anıñ Ufadağı wäkile Konstantin Potnin. – Bez keşe xoquqları bozıluğa bäyle cäncallı xällärne tikşeräbez. Blagoveşçendağı waqiğalar uñayınnan alıp barıluçı mäxkämäne dä kontrol'dä totabız. Şul uq waqıtta bez üz eşebezne berkemnän dä qaçmıyça, ä, kiresençä, törle räsmi oyışmalar belän tığız xezmättäşlektä alıp barabız. Başqortstanda keşe xoquqlarınıñ torışı xaqında yıl sayın xalıqara oyışmalarğa xisaplar äzerlibez. Älbättä, ul xisaplardağı döreslek Başqortstanda kemgäder oşap ta betmider. Şuña da bezgä qarşı başlanğan höcüm ber qarağanda ğäcäplänerlek tä tügel inde”.

Konstantin Potnin äytüençä, bäysez cämäğätçelek oyışmaları xaqında Rossiädä qabul itelgän yaña qanunnıñ iñ başta xoquq yaqlaw oyışmalarına kiterep suğaçağı kön kebek açıq ide. “Menä bezneñ “Xalıqara standart” fondı şunıñ berençe qorbanı itep saylandı, axrı”, - di Potnin äfände.

XS
SM
MD
LG