Accessibility links

шимбә, 10 декабрь 2016, Казан вакыты 04:19

Başqortstanda milliarderlar da arta


Başqortstan Xökümätendä xezmät xaqların tüläwne tikşerü komissiäseneñ çirattağı utırışı bulıp ütte. Respublika premyer-ministrı Rafael' Baydäülätov citäkçelegendä här öç ay sayın uzdırıluçı şuşı utırış öç'yaklı komissiä utırışı dip atala. Anda hönär berlekläre wäkilläre häm eş belän tä'min itüçelär dä qatnaşa.

Bu yulı älege kiñäşmä ayıruça canlı ütte. Çönki Başqortstanda bu yıl başınnan xezmät xaqları tüläwdä burıçlar ay sayın arta barıp aqıl citmäslek sannarğa citkän. Ğomum küläm 124 million sumnan artıp kitkänlege mäğlüm. Premyer-ministr xezmät xaqların tülämäwdä rekord quyuçı qayber şirkätlärne häm oyışmalarnı ayırım isemläp atadı. “Kvartal sayın oçraşıp, xälne uñay yaqqa üzgärtergä kiräk, digän bulıp, laf orabız, ä berni dä üzgärmi”, – dip belderde ul zalda utıruçılarğa usal qaraş taşlap.

Başqortstan Premyer-ministrı Rafael' Baydäülätov üzeneñ çığışında başqa törle qızıqlı sannarnı da bäyän itte. Anıñ süzlärençä, ayırım keşelärneñ 2005 yılğı tabışlar öçen birgän deklaratsiälärennän kürenüençä, Başqortstanda xäzer 3 keşe rubl' milliarderı bulğan. Yäğni alarnıñ yıllıq kereme 1 milliard rubl'dän artıp kitkän.

“Süz dä yuq, üzläreneñ xäläl köçe belän eşläp tapqan bulsalar, bu keşelärne maqtarğa ğına kiräk, läkin bu bit alay tügel – dide Xökümät räise. – Eş şundıy tizlektä barsa, bezdä kiläse yılda milliarder bulğan keşelär sanı 10га citäçäk. Ä annan soñ inde dollar milliarderları da päyda bulaçaq”.

Rafael' Baydäülätov tağın ber ğibrätle misal kiterde. Bıyıl Başqortstandağı ber keşe, şäxsi zat bularaq, ike ay eçendä genä dä 1,3 milliard sum keremen kulakçağa äyländergän.

Utırışta çığış yasağan Federal' salım xezmäteneñ Başqortstan idaräse başlığı Rämzil Nizametdinov “respublikadağı 3 milliardernıñ keremnäre çığanaqların tikşerü eşläre tizdän başlanaçaq”, dip ışandırdı Xökümät räisen.

XS
SM
MD
LG