Accessibility links

İjawda Ramazan Ğäyetenä cıyıluçılar sanı arta bara


Ramazan ğayıtenä İjaw Cämiğ mäçetenä bıyıl eş köne buluına qaramastan keşe küpläp cıyıldı. Mäçet eçenä sıymağan din totuçılar ğibädät yortı işek aldında, mäçetneñ asqı qatında saflarğa tözelep bergäläp qayıt namazın uqıdı, wäğäz tıñladı. Yıldan yıl mäçetkä bäyräm namazlarına keşelärneñ küpläp kilüenä mäçet qarşında oyıştırılğan mädräsälärneñ dä, din totuçılarğa ireklek birelüe dä säbäp buldı. Namazdan çıqqan İjawdağı elekkege tatar mäktäbe direktorı Ädip Kärimov dini qanunnarnı ütäwçe keşelärneñ artuına söyenü xislären belderde.

Ädip Safa ulı Kärimov süzlärençä, 70-nçe yıllarda uqıtuçılarğa raykomda partiä äğzaları aldında cawap totmas öçen, ata—analarğa balalarnı mäçetlärdän yıraq totarğa kiñäş itä idek, ämmä balalar, bigräk tä malaylar irtän mäçetkä kerep çığalar ide dip söyläde. Bu xaqta üzebezneñ tuğannardan işetergä turı kilde.

Ramazan ayı buyına Udmurtiädä yäşäwçe möselmannar könnären izge ğämällär qılıp, kiçlären ğibädättä uzdırdı. «Azatlıq» radiosın tıñlawçılar xäterlider, ramazan ayında İjawda öçençe mäçet tözelä başlandı. Mäçetlärgä täräwix namazlarına da, iftar aşlarına da keşe kübräk kilde, dip urtaqlaştı İjaw mäçete imamı Faiz xäzrät Möxämmätşin.

Axşamnan soñ biredä iftar aşap, täräwix namazların da uqıp kitkän küp kenä din qärdäşlärebez. Şuña da Faiz xäzrät İjaw şähäreneñ başqa rayonnarında da mäçetlär bulsa, möselmannarğa namazğa yörergä ciñel bulır ide dip assızıqladı. Ämmä keşelär awırlıqlarğa da qaramastan, ütkän yıllar belän çağıştırğanda, bıyıl täräwix namazlarına kübräk cıyıldı dip urtaqlaştı İjaw Cämiğ mäçete imamı Faiz xäzrät Möxämmätşin.

Un kön sayın tәrawix namazlarına yörgän balalarğa da büläklär birep, alarnı söyenderdek, dip däwam itte Faiz xäzrät. Balalarğa büläklärne mäçet häm biregä ğibädät qılırğa yörüçe berniçä firma citäkçeläre alğan.

Bıyılğı ramazan ayınıñ tağın ber üzençälege - ramazan ayı başlanır aldınnan uq iftar aşların mäçet aşxanäsendä uzdıru öçen könnär aldan bilgelänep betkän.

Bäyräm namazına irtän irtük kilgän din qärdäşlärebez belän aralaşırğa turı kilde.

Mäçet işek aldında yaña tözeläçäk mäçetlärgä dä sädäqänı küpläp birdelär dip urtaqlaştılar Änisä apa Zakirova belän Rawil ağa Mäğdiev.

Rawil Mäğdiev süzlärençä, şuşındıy bäyrämnär möselmannarnıñ berdämlegen arttıra. Şulay uq mäçettä Üzbäkstannan da din qärdäşlärebez küpläp cıyılğan. Alar ata-babalarıbız yolaların ütärgä tırışabız dip urtaqlaştılar.

Xämidä Ğayfullina, İjaw

XS
SM
MD
LG