Accessibility links

якшәмбе, 4 декабрь 2016, Казан вакыты 06:58

Başqortstan möselmannarı Uraza bäyrämen bilgeläde


23 nçe üktäber dönyadağı barlıq möselmannar Uraza bäyrämen bilgeläde. Şul isäptän Başqortstan möselmannarı da. Bügen respublikada alarnıñ sanı ike millionnan artıq. Respublikanıñ barlıq mäçetlärendä bäyräm çaraları uzdı. Töp çara — tantanalı ğibädät qılular Ufanıñ Lalä-Tyulpan cämiğ mäçetendä ütte. Anı Rusiä möselmannarınıñ Üzäk diniä näzaräte başı, möfti Tälğät Tacetdin alıp bardı.

Çara irtänge namaz belän başlandı, artaban möfti wäğäz söyläde. Wäğäzen ul başta urıs telendä söyläde, çönki ul Rusiäneñ üzäk televideniese aşa kürsätelde. Anda möfti qayçandır Adäm belän Häwa da tıyılğan cimeştän tıyılıp torğan, bu da üzenä kürä ber uraza dip belderde. Rusiädä törle millät häm konfessiä wäkilläre yäşäwen Xoday quşuı buyınça dip añlattı. Ul çığışında cämğiättä din-ara qarşılıqlar tudırırğa omtılışlar da buluın telgä alıp, borçılu belderde.

Artaban möfti wäğäzen tatar telendä däwam itte. Anda ul islam dinen totuçılarnıñ xalıqlar arasında duslıq häm tuğanlıqqa çaqıruda öleş kertüen bilgeläde. İldä din totu öçen şartlar citärlek dide. Rusiä häm Başqortstan citäkçeläreneñ bäyräm qotlawların ireşterde.

Tacetdin çığışında uraza sädaqası külämen dä bäyän itte. Anıñ süzlärenä qarağanda, fitır sädaqası küläme bıyıl 20сум, zäkyät meñ sum tiräse. Wäğäzdän soñ ul cıyıluçılarnı bäyräm belän qotladı, artaban Uraza namazı, qor’än uqıldı.

Başqortstanda küpme keşe uraza totuı turında tögäl sannar yuq, şulay da xäbärlär uraza totuçılarnıñ yıldan- yıl kübäyüe turında söyli. “Azatlıq” xäbärçeseneñ ufalılardan uraza totu-totmawları turında beleşüdä qatnaşuçılarnıñ yartığa yaqını uraza totuların belderde. Uraza totmawçılarnıñ ber öleşe (küpçelege ölkän yäştägelär) sälämätlege bulmawğa zarlandı. Çağıştırmaça yäşräklär kiläçäktä totarğa cıyınularnıñ äyttelär.

Mönir Wafin, Ufa

XS
SM
MD
LG