Accessibility links

чәршәмбе, 7 декабрь 2016, Казан вакыты 13:38

Tatarstannıñ Londondağı İnvestitsiälär Summitı


Tatarstannıñ uzğan atna azağında Londonda İnvestitsiälär summitı ütkärüe respublikanıñ tışqı iqtisad ölkäsendäge iñ zur ğämällärneñ berse bulıp tora. Mäğlüm ki, kiläçäktä räsmi Qazan näq şundıy uq çaranı Qıtay başqalası Pekindä, ä annarı Singapurda da ütkärergä cıyına. Londondağı summitnı isä Könbatışnıñ anda qatnaşqan wäkilläre Tatarstan şulay itep Rusiädäge başqa töbäklär öçen ber ürnäkkä äylänä baruın kürsätkän ber çara, dip bäyäli.

Tatarstannıñ üz investitsiä mömkinleklären täqdim itüen näq menä Londonnan başlawı yuqqa tügel - britan başqalası dönyadağı iñ zur finans üzäkläreneñ berse sanala. İnvestitsiä Summitı maqsat itep Könbatışnıñ business dairäläre iğtibarın Tatarstan belän säwdä itüneñ nindi caylı wä uñay buluına cälep itüne quyğan ide. Çaranı oyıştıruçılarnıñ berse, Tatarstannıñ tışqı iqtisadi säwdä ministrı Xafiz Salixov:

"Bezneñ iqtisadi säyäsätebez tışqı elemtälärgä bik bäylängän, bigräk tä London belän. Tatarstanğa investitsiälär belän kilgän härkemgä şunı äytäsebez kilä - sezneñ eşegez uñışlı bulır!", di ministr Salixov.

Çit investitsiälärne cälep itü eşen Tatarstan üzeneñ otışlı urının, neft yatmaları buluın, aldınğı industriäsen alğa sörep kenä tügel, yaña östenleklären kürsätep tä alıp bara. Qayber küzätüçelär, Tatarstan Rusiädäge başqa töbäklärdän häm xätta Bäysez Däwlätlär Berdämlegendäge qayber illärdän ayırmalı bularaq, tırışa-tırışa business öçen qulay şartlar tudıru eşen alıp bara, dip isäpli. Şul fikerdä toruçılarnıñ berse, Dönya Bankınıñ Rusiädäge mödire Kristalina Georgieva:

"Bez İdel buyındağı dürt töbäkne çağıştırıp qarağan idek - Tübän Novgorod, Tatarstan, Samara häm Sarıtawnı. Businesstağı kirtälärne alıp atu omtılışları yağınnan qarağanda, şul 4 töbäk arasınnan Tatarstan başqalardan küpkä alğa kitkän ide", dip bäyäli Tatarstandağı business alıp baru möxiten Dönya Bankınıñ Rusiädäge mödire Kristalina Georgieva.

Georgieva süzlärenä qarağanda, Tatarstanda yaña businessnı terkäw öçen barı tik 7 genä kön kiräk, ä menä Mäskäwdä bu kürsätkeç 28 kön. Ul şulay uq, Tatarstan xakimiäte Dönya Bankı belän xezmättäşlek itü, añardan kiñäşlär alu ölkäsendä dä aktiv eş alıp bara, dip belderä.

Tatarstan xökümätendäge berençe vitse-premyer, İqtisad häm İndustriä komitetı başlığı Boris Pavlov, üzenä investitsiälär kiterü eşenä Tatarstan bik citdi qarıy, di:

"Tatarstanda barınnan da bigräk investitsiälärne cälep itü, investorlarğa üz proyektların ğämälgä quyuğa yardäm itü öçen däwlät sisteması buldırılğan. Bezdä investitsiälärne yaqlaw garantiälänä. Businessnıñ iminlege ul iñ möhim närsä", di Tatarstannıñ berençe vitse-premyerı Boris Pavlov.

Ğomumän alğanda, Londondağı İnvestitsiä Summitında Tatarstan üzen nigezdä uñay yaqtan kürsätä aldı, dip belderä anda qatnaşqan belgeçlär. Xäzer inde Qazan näq şundıy uq çaranı Pekindä häm Könyaq-könçığış Aziäneñ finans başqalası Singapurda ütkärergä äzerlänä.

Kärim Kamal

XS
SM
MD
LG