Accessibility links

якшәмбе, 11 декабрь 2016, Казан вакыты 07:14

Respublikada räsmi räweştä nikaxların terkäwçelär artqan


Grajdannar aktların terkäw eşe yıl başınnan birle härber rayonda, härber awılda başqarıla – yaña qanun nigezendä. Barlığı 999 munitsipal' cirlektä. Respublikanıñ Grajdannar aktların terkäw idäräse wäkilläre soñğı 3 ayda tikşerülär uzdırğannar – barlığı 21 rayonnıñ törle awıllarında bulğannar. Şunıñ näticäse bularaq, räsmi räweştä nikaxların terkäwçelär artqan dip bilgelängän. Awılda härkem ber-bersen belä, şul isäptän ZAGS xezmätkärläre dä. Häm alar berençe çiratta nikaxları räsmi bulsın öçen awıldaşların öndilär dielde utırışta. Şulay itep ber-berse belän qaçıp-posıp yäşäp yatuçılarnıñ qoyrıqları bozğa qatqan. Däwlät xezmätkärläre öçen bu bilgele otışlı. Räsmi xisaplar yazğanda ayıruça. Sişämbe könne uzğan utırışta isä yaña qanunğa mädxiä uqıldı. Grajdannar aktların terkäwne oyıştıru häm tikşerü bülege citäkçese Boris Xafizov

Soñğı 3 ayda respublikanıñ 21 rayonında buldıq, şul isäptän 30-40 protsent awıllarnı tikşerdek. Häm bügenge köndä çınnan da bu qanun kiräk bulğan digän näticä yasaldı. Bu eşkä can kerde. Nikaxnı terkämäwçelärgä dä alar räsmiläşterüne sorap möräcäğät itälär.

Boris Xafizov şuşı 9 ayda respublikada ülüçelär sanı da kimede dip bilgeläp uzdı 4 protsentqa. Bilgele bu söyeneçle küreneş. Çönki soñğı yıllarda tuuçılar sanı respublikada xätta 30 protsentqa kimede, ä ülüçelär sanı haman arta bara. Çañ qağar waqıt citte. Läkin utırışta demografiä mäs’äläsenä älläni tuqtalmadılar. Anda terkäw mäs’äläsendäge neçkäleklär turında söyläştelär. Kiläse yıldan Grajdannar aktların terkäwne başqaruçı oyışmalarğa aqça bülüdä üzgäreşlär kerergä mömkin. Boris Xafizov

Ğämäldäge metodqa buyınça xäzer aqça keşelär sanına qarap birelä, bu bik ük ğädel tügel. Şuña kiläse yıldan anı Grajdannar aktların terkägän eşlärgä qarap birü öçen qanun eşlibez.

Boris Xafizov belderüençä, näticälär kürsätkänçä bıyıl Çüpräle, Täteş, Layış, Balıq Bistäse rayonnarında grajdannarnı aktların terkäw eşläre öçen bülengän aqça az bulğan, şul uq waqıtta Çallıda ul 20 protsentqa artığraq birelgän dip isäplängän.

Landış Xarrasova

XS
SM
MD
LG