Accessibility links

Кайнар хәбәр

Mädäni miras obyektları nik tarixi binalar isemlegennän çığarılğan


Tatarstan Däwlät Şurasınıñ Mädäniät, fän, mäğärif häm milli mäs'älälär komitetı utırışında bilgele bulğança, 15 sentäberdä Ministrlar Kabinetı çığarğan qararğa Qazannıñ Qamal teatrı qarşında urnaşqan tarixi “Bolğar” qunaqxanäse häm tağın berniçä mädäni miras binası kergän. Xäzer alar däwlät saqlıy torğan binalar isemlegennän çığarılğannar. Dimäk alarnı tözekländerergä dä sütärgä dä, satarğa da röxsät. Ä ul binalarnıñ ähämiätlelegen äytep betergesez.

Komitet utırışında berençe çiratta ğayıplelärne tabarğa tırıştılar. Ayıruça “Bolğar” kunakxanäsenä basım yasaldı. Tatarstannıñ mädäniät ministrlığınıñ tarixi häm mädäni häykällärne saqlaw, faydalanu häm küzätçelek idäräse citäkçese İğor Nesterenкo mondıy xäl Tatarstanda ğına tügel ä böten Rusiädä bara dide. Çönki binalarnı saqlarğa mömkinlek birüçe dokumentlar da, monıñ öçen maxsus oyışma da yuq. Tarixi bina bulğanğa anı investorlar tözekländerä almıy, çönki xoquqları yuq. Ä respublika byudjetınıñ şulay uq aqçası yuq. Dimäk tarixi häykällär binası isemlegennän çığarğaç qına ul binalar yä sütelergä, yä ädäm rätenä kilergä mömkin. Komitet utırışında İğor Nesterenкo şulay dide. Tizdän inde Bauman uramındağı “Qazan” qunaqxanäsen dä yuğaltaçaqbız dielde. Qazanıñ 1000 yıllığı aldınnan anı tözekländerälär dip şaqtıy söyläsälär dä, ul niçek bar şulay basıp tora.

Utırışta äytelgänçä, berençe bulıp tarixi bina isemlegennän çığaru belän Qazan şähäre xakimiäte möräcäğät itkän. Mer İlsur Metşin maxsus xat ta yullağan. Utırışta qatnaşqan Qazannıñ miras obyektların saqlawçı oyışma citäkçese Ol'ğa Aksent'yeva belderüençä, häykällärne isemlektän töşerü öçen härkem möräcäğät itä ala. Monıñ öçen anıñ tarixi häm arxitektura ähämiäte inde yuğalğan bulırğa tieş. Läkin qaywaqıt yalğışlıqlar da kitä ikän bäyälägändä häm kiräkle binalarnı sütü oçraqları da bulğalağan. Mondıy xäl bulmasın öçen berdäm mäğlümatı baza kiräk dielde. Bilgele ki, “Bolğar” qunaqxanäseneñ ähämiäte äytep betergesez. Bügen utırışta da şul xaqta äytelde. Däwlät Şurası mondıy kilep çıqqan xäl nisbätennän Rusiäneñ Däwlät Dumasına qanun çığaru öçen möräcäğät itärgä uylıy. Älege mäs'älä Däwlät şurasınıñ çirattağı sessiäsendä dä qaralaçaq.

Pänceşämbe könne isä Däwlät Şurasında älege uñaydan maxsus matbuğat oçraşuı da oyıştırılaçaq. Tarixi binalarnı saqlap qalu buyınça deputatlar fikerlären bez aldağı tapşırularda citkererbez. Landış Xarrasova

XS
SM
MD
LG