Звезда Поволжья gäziteneñ soñğı sanında Räşit Äxmätov, inde teldän töşmägän, küz kürmägän Universiadanıñ gäwdäläneşe çınlıqta da kürenä başladı dip yaza. Aña mondıy fiker, Qazanğa Universiada citäkçeläre kilep kitkäç kilgän. 2011 yılda uzarğa tieşle bu çaranıñ bäyäse 1.5 milliard dollar di ul. Häm bu Qazannıñ meñ yıllığına kitkän çığımnarnıñ öçtän berenä tiñ ikän. Äle Qazanda uzarmı- yuqmı, bilgele tügel, ämma säyäsät uynala başladı.
Menä Universiadanıñ citäkçeläre Qazanğa kiler aldınnan, Putin yanında buldılar. Alarğa Rusiä prezidentı Qazannıñ iñ şäp urın, respublika alğa arğaqamaq kebek omtıla dip maqtadı. Räşit Äxmätov, näq menä bu oçraşuda, Tatarstan öçen qızıq säyäsät kürä. Eş şunda ki, anda, Tatarstan isemennän Şäymiev ta tügel, Universiadanı qabul itärgä äzerlängän Qazan isemennän Metşin dä tügel, ä Miñlexanov- respublika premyer-ministrı qatnaştı. Räşit Äxmätov, bu xälne, Mintimer Şäymiev urınıa iñ layıklı dip Şäymiev tarafınnan uq Röstäm Miñlexanov saylap alınğan dip bara. Mintimer Şäymiev ber eşne dä yuqqa ğına eşlämi di avtor. Rusiä prezidentı qarşına da Miñlexanovnı kürsäter öçen cibärgän ul digänräk fiker citkerä.
Soñğı waqıtta Mintimer Şäymiev ike märtäbä üzennän soñ prezident itep kürergä telägän keşe turında belderde. Londonda waqıtta, BBC kanalına, ul, äybät yegetlär bar dip äytte. Läkin familiä äytmäde. Monnan tış, ul berniçä yıl, respublika belän 70 yäşlek qart idärä itüen telämäs idem digän ide. Ä yaña yıldan soñ aña 70 tula. Şuña kürä, matbuğatta da, Şäymievnıñ üzennän dä bu xaqta fikerlär kübäyde. Звезда Поволжья gäzite, Univiversiada dip atlağan yazmasında, Tatarstannıñ kiläçäk citäkçese Röstäm Miñlexanov bulırmı ikänlegenä cawap birmi. Läkin, anıñ citäkçelegendäge ministrlar kabinetı respublikanıñ iqtisatın totrıqlı üsterep kilä. Monı Putin da bilgeläp uzdı dip yaza. Şul uq waqıtta, qayber küzätüçelär, Miñlexanov kiläçäktä respublika citäkçese bulırmı - yuqmı digän süzlär yışayğaç uq, premyerğa qarşı qara PR kitte dip sanıylar. Menä bu könnärdä genä başlanğan Bolğar numirları mä’säläse şul qara PRnıñ ber ğälämäte dip belderälär. Bu eşlär yıraqtan torıp başqarıla dip sanıylar.
Räfis Cämdixan
