Accessibility links

чәршәмбе, 7 декабрь 2016, Казан вакыты 21:36

Törkiädä yänä zilzilä qurquı


Keşe canı tämle, iñ zur qurqu da ülem. 1999 yılnıñ Augustında räsmi sannarğa kürä 17, räsmi bulmağan sannarğa kürä, 40-50 meñ keşe xälaq bulğan 7.4 Richter ülçäwe köçendäge zilzilä, yäğni cir teträw äle dä istä. Bu bäyräm atnası başında Marmara Diñgeze yarlarında berençese Manyasta ikençese Gämlik qultığında 5.2 Richter ülçäwe köçendäge ike cir teträw keşelärneñ tiränlärgä kümä başlağan ülem qurquın qabat öskä töşerde.

Cir beleme belän şöğellängän geolog, injener kebek belgeçlärneñ aldıbızda İstanbulda bik zur zilzilä bulaçaq, älegä bu ike waq zilzeläne anıñ xäbärçese dip bäyäli almıybız digän belderüläre xalıqnı tağın da küberäk örkette. İstanbul Bogaziçi Universitetı qarşındağı Kandilli Zilzilä Tikşerenüläre İnstitutı internet säxifäsenä soñğı 4 ayda 2 million da 240 meñ keşe möräcägät itkän, ä bu atnadağı cir teträwlärdän soñ isä 150 meñ keşe şuşı internet säxifäsennän mäğlümät alırğa tırışqan.

İstanbul Texnik Universitetı Minerologiä Fakultetınan Professor Naci Görür "Bu zilzilälär bez kötkän zur cir teträwneñ ayaq tawışları" dip xalıqnı tağın da qurqıttı. Zilzilä şurası citäkçese Profesör Haluk Eyidoğan, “cir teträw ilebezdä yözyıllardan birle bulıp kilä, mondan soñ da bulaçaq. Miña kürä, cir astında nindi zur çatnaqlar bar dip baş qatırğançı, zur ber zilzeläne qarşı alırğa äzerlegebez ni däräcädä, şul turıda baş waqıtyq” dide.

Hürriyet gazetasınıñ kürenekle jurnalistlarınnan yazuçı Oktay Ekşi “Qurqınıç işekne şaqadı” isemle mäqaläsendä bolay dip yaza: “Telänmägän qunaq İstanbulnıñ işegän şaqıdı. Läkin kem dä bik ähämmiät birmäde. Monarğa şaq qatırğa bulmıy. Çönki İstanbul toygısız. Başqa törle bulsa 1999 yılnıñ 17 Augustındağı dähşätle zilzilädän soñ ber adım atlar, yaña ber cir teträwgä qarşı äzerlekle bulu omtılışın, telägen kürsäter ide.” Dimäk, adäm balası naçar närsälärne tiz onıta, yaki onıtırğa tırışa. Ä selketkän sayın isä iske qurqular qabat östkä çığa. Menä 12 million yäşägän İstanbul häm tirä yaqlarıda bu atnada xällär şundıyraq ide.

Äxtäm İbrahim, İstanbul
XS
SM
MD
LG