Accessibility links

якшәмбе, 11 декабрь 2016, Казан вакыты 01:35

Tatar diskätüklärendä meñlägän yäşlär


Başqalada uzuçı tatarça mädäni çaralarğa xalıq az yöri. Xäter köne, şiğır bäyrämnärendä dä şul uq xäl. Klassik tatar cırçılarına da kübräk ölkän yäştäge tamaşaçılar kilä. Ä yäşlär qayda soñ? Alar diskätüklärdä!!!(yäşlär tawışları, qıçqırular) Sez meñlägän tatar yäşläreneñ tawışların işettegez. Qıçqırular 26 oktäberdä Qazannıñ “SKJ” tönge klubında uzğan diskätüktän alındı. Anda “Bars Media” şirkäte üzeneñ “Käyef niçek?” gazetasınıñ ber yäşlek tuğan könenä sıltap çirattağı diskätügen uzdırdı. Küpläregez gazetanıñ tuğan köne bulğaç, başqa gazetalardağı kebek redaktor, jurnalistlarnı äytkännärder, qotlağannardır dip uylarsız. Yuq, bolarnıñ berse dä bulmadı. “Bars Media”nıñ ğädättäge diskätüge ide bu. Mondıy tuslanularda kübräk awıldan kilep şähärdä uquçı studentlar. Xäzer inde tatar telle şähär yäşläre dä tartıla. Oyıştıruçılar bäyäne arttıra bara, xäzer 150 sumğa citte. Ber yıl elek 100дән artmıy ide. “Yäşlär bolay meñärläp kilsä, kiläçäktä tağın da arttırırlar äle” - dilär tuslanırğa yaratuçılar. Xäzer inde meñärlägän tatar yäşlären tönge klublarğa cıyuçı şirkätlärne qarap kitik. “Bars Media”ğa köndäş “Osqar rekords” häm “Yaña ğasır” radio-televideniäse. Bersen-berse etä-törtä tamaşaçılarnı, yäşlärne küñel açu üzäklärenä cıyalar. Monı şuşı uq diskätüklärdä kürergä mömkin. Başqalada noyäber ayında bik siräk küreneşlärneñ berse kötelä. Qazannıñ “Piramida” häm “SKJ” küñel açu üzäklärendä ber ük tönne zur tatar diskätüge. 9 noyäberdä “Osqar-rekords” belän berlektä “Yaña ğasır” telekompaniäseñ “Yäşlär tuqtalışı” tapşıruı tuğan könen “SKJ” klubında diskätük yasap ütkärmäkçe. Cırçıları “Bars”larğa al'ternativa bulıp sanala, roq, rep, texno häm başqa stillärdä cırlawçılar. Şuşı uq tönne “Bars Media” “Piramida” da tağın yäşlärne tatarça tuslanırğa çaqıra. Bäylär ikesendä ber ük diärlek. Ä tatar disätüklärenä yörüçe yäşlär ber massa. “Bu massanı ber töndä Osqar belän Bars niçek bülep betererlär ikän” - dilär tatar şou biznesında qaynawçılar. Kiläçäktä “Yaña ğasır” telekanalı “Osqar-rekords” belän yänädän tatarça tuslanular ütkärmäkçe. “Xäzer sıyfat ikençe urında buğay, oyıştıruçılar iñ möhime xalıq küp bulsın dip tırşalar ”- dilär tatar diskätüklären, tamaşaların küzätep baruçılar. Diskätülärgä qızıqsındıru çaraları da küptörle buldı, rus xitların da tärcemä ittelär, qara tänle yegetlärne tatarça cırlarğa da öyrättelär. Kiläçäktä närsä bulır, waqıt kürsäter. Röstäm İsxaqi

XS
SM
MD
LG