Accessibility links

пәнҗешәмбе, 8 декабрь 2016, Казан вакыты 23:22

Başqortstanda qayber ministrlıqlar beterelä


Başqortstanda moñarçı eşläp kilgän qayber ministrlıqlar betereläçäk. Ä bäğze ber ministrlıqlarnıñ citäkçeläre almaştırılaçaq. Bu xaqta atnakiç könne yañadan premyer-ministr itep raslanğan elekke Xökümät başlığı Rafael' Baydäülätov jurnalistlar belän oçraşuda belderde.



Rafael' Baydäülätovnı yañadan premyer itep bilgeläw öçen, Prezident Mortaza Räximov parlamentqa täqdim itkän ide. Atnakiç könne Başqortstan Däwlät Cıyılışı-Qorıltaynıñ çirattağı utırışında deputatlar Mortaza Räximovnıñ üteneçen yıqmadı, kiresençä, bertawıştan xupladı. Xäzer 15 noyäbergä qädär Rafael' Baydäülätov Ministrlar kabinetına yaña ministrlar häm däwlät komitetları başlıqların täqdim itärgä tieş. Jurnalistlar belän söyläşüdä Baydäülätov äfände yaña Xökümättä baytaq qına üzgäreşlär dä bulaçağına işarä yasadı. Anıñ süzlärençä, qayber ministrlıqlarnı beterü küzallana. Misalğa Yustitsiä ministrlığın kiterde ul.



“Xökümätneñ strukturasında üzgäreşlär bula. Bik zur bulmasa da yañalıqlar kötelä. Ministrlarnıñ da barısı da raslanmasqa mömkin”, - di R. Baydäülätov.



Başqortstan Xökümäte başlığı Rafael' Baydäülätov süzlärençä, ğomumän alğanda, ministrlar häm törle vedomstvolar citäkçeläre sınalğan häm tikşerelgän keşelär. Ämma xäzerge şartlarda yañaça fikerläwçe şäxeslär taläp itelä. “Xätta minem üzemneñ täcribäm zur bulsa da, minnän dä yañaça eşçänlek sorala, bu minem öçen yaña imtixan”, - dide ul.



Belgeçlär fikerençä, Başqortstan Xökümäte başlığı, härxäldä, üzenä tuğrılıq kürsätkän ministrlarnı wazıyfalarında qaldıraçaq, ä kemnärder törle säbäplär belän känäfilärennän qolaq qağa ikän, bu nigezdä, şäxsi mönäsäbätlärgä bäyle bulaçaq.













XS
SM
MD
LG