Ufada 18 noyäber könne “Watandaşlar forumı” dip atalğan oyışmanıñ çirattağı cıyını ütäçäk. Bu turıda Başqortstan Berläşkän oppozitsiäseneñ koordinatsiä şurası utırışında qarar itelde. “Watandaşlar forumı” dip atalğan yaña oyışma bıyıl cäy Ufada oyıştırılğan ide. Aña Başqortstanda xakimiätlärgä oppozitsiädä toruçı partiälär häm cämäğätçelek oyışmaları wäkilläre, cämğısı yegermeläp oyışma äğzaları kerde.
“Watandaşlar forumı”nıñ ber zur cıyını Ufada üz fatirlarınnan köç qullanıp quıluçılarnı yaqlawğa bağışlanğan ide. Ä inde 18 noyäberdä ütäçäk cıyında Başqortstandağı mäğärif ölkäsendäge xällär xaqında citdi söyläşü ütkärergä buldılar.
Başqortstan Berläşkän oppozitsiäse Koordinatsiä şurası äğzaları fikerençä, respublikada bu uqu yılınnan barlıq millätlär balalarına da köçläp başqort telen öyrätä başlaw keşe xoquqları bozu bulıp tora. “Başqort telen öyrätü barı tik balalarnıñ üz ixtıärı belän genä ğämälgä aşırılırğa tieş, - dip belderä “Watandaşlar forumı”nıñ räise Anatoliy Dubovskiy. – Başqortstan Mäğärif ministrlığı citäkçeläreneñ uylap citkermägän säyäsäte arqasında, başqort telenä qarata xörmät tärbiäläw urınına aña näfrät kenä arta”.
Başqortstan Tatarları milli-mädäni moxtariäte räise urınbasarı, professor Mäcit Xucin da bügenge köndä respublikada mäğärif ölkäsendä başlanğan yañalıqlarnı xata adımnar dip atıy. “Başqort bulmağan başqa millätlär balaları başqort tele däreslärenä telämiçä yöri. Küp urında balalarnıñ mäktäptän yılap qaytu oçraqları bar”, - di ul.
Başqortstan Tatarları milli-mädäni moxtariäte räise urınbasarı, professor Mäcit Xucin süzlärençä, bügenge köndä 18 noyäberdä Ufada ütäçäk “Watandaşlar forumı” oyışması cıyınına äzerlek başlanğan da inde. “Anda ayıruça urıs, tatar, çuaş häm mari milli oyışmaları wäkilläre üzläreneñ mäğärif ölkäsendäge däğwäları xaqında mäğlümatlar tuplıy, - di ul. – Şul isäptän tatar milli oyışmaları da respublikada tatar mäktäpläreneñ häm tatar sıynıflarınıñ kimi baruına tögäl sannar belän dälillär bäyän itäçäk”.
