Accessibility links

сишәмбе, 6 декабрь 2016, Казан вакыты 06:02

Räsix Xannanovqa 75 yäş tuldı


Başqortstandağı kürenekle tatar jurnalistı häm yazuçı Rasix Xannanovqa 75 yäş tuldı. Şuşı uñaydan comğa könne Ufadağı Akterlar yortında anıñ yubiley kiçäse ütä. Bäyrämdä säxnä türendä Räsix ağanıñ icattaş dusları da bar. Kompozitorlar Tälğat Şäripov belän Rim Xäsänov, cırçılar Zäki Mäxmütov, Ğali Xämzin, Mäskäwdän kilgän Roza Xäbibullina häm başqalar qotlıy yubilyarnı.

Rasix Xannanov ğömere buyı jurnalistikada eşläsä dä, yazuçılıq eşe öçen dä waqıt taba ide. Ufada tatar telendä çığuçı “Qızıl tañ” gazetasında utız yıldan artıq xezmät itte Rasix Xannanov. Başta ädäbi xezmätkär buldı. Annan soñ törle büleklärne citäkläde, ozaq yıllar baş möxärrir urınbasarı buldı. Ä inde layıqlı yalğa kitkänçe, berniçä yıl “Qızıl tañ”nıñ baş möxärrire yögen dä tarttı ul.

Ädäbi icatta kübräk prozada üzen tanıttı Rasix ağa. Anıñ berniçä romanı, povest'ları häm bik küp xikäyäläre basıldı. Şul uq waqıtta ädäbiät söyüçelär Rasix Xannanovnı lirik şağir bularaq ta belä. Anıñ 200 gä yaqın şiğerenä kompozitorlar bik matur cırlar da icat itte.



XS
SM
MD
LG