Accessibility links

дүшәмбе, 5 декабрь 2016, Казан вакыты 05:31

Halloween bäyräme Qazanda da uza


Kön tudımı yaña ğädät kilä xäzer. Globalizatsiä şartlarında yäşäwebezne televizor qarap, yäki kampiter artında utırıp qına kürmibez. Çit qäwem, başqa millät yolaları basa tora. Bu inde kürşedä genä yäşägän Maryusa apa ğädäte genä tügel. Anısına iäläşep betkän inde. Xäzer, yıraq Amerika da kürşe abzarda ğına ğädätläre belän yäşäp yata. Menä bu könnärdä genä kiçke Qazan uramnarı buylap şamaqay bulıp kiengän yäşlär törkemnären kürergä mömkin ide. Böten Könbatış häm bigräk tä Amerika Helloween bäyrämen uzdıra. Dimäk Qazanğa da kilep citkän.

Ä bu borınğı kel'tlarnıñ mäcüsi bäyräme. Qabaq bäyräme. Qabaqnıñ eçen çistartalar da, anda awız, küz yasap, eçenä şäm tığıp tönlä keşe qurqıtalar. Monnan tış, bu 1 nçe noyäbergä qarşı töndä böten izgelär wä ülgännär köne sanala. Şul töndä alarnıñ ruxları belän oçraşır öçen şamaqay bulıp yäki törle qotsız qiäfätkä kerep kienälär. Añlaşıla, Rusiädäge din ähelläre, ataqaylar bu mäcüsi bäyrämne bilgeläp ütügä qarşı. Şulay uq, älege çit ğädätkä möselman din ähelläre dä qarşı çığa. Mäcüsi bit. Anısı, tatarlarda da, awıl cirendä Şamaqay bulıp kienep, keşe qurqıtıp yörü ğädäte bulğan dilär fol'klor belgeçläre. Anısı da ayırım ber bäyrämnärdä. Läkin, bu Helloween tügel. Qazanda, ingliz telen tiränten öyränüçe mäktäplärdä dä Helloween bäyräme inde distä yıllar buyına bilgeläp ütelä. Älege mäktäpne tämamlawçılar bu çaranı matur itep iskä ala. Bu könnärdä Helloween Qazannıñ tönge klublarınıñ bersendä dä uzaçaq. Ä tatar yäşlärenä bu äyber kiräkme soñ? Çit-yat ğädätlär basıp barğanda, tatarnıñ üzeneke onıtıla bit ul. Şul xaqta, “Üzebez” yaña buın xäräkäte koordinatorlarınıñ berse Rezeda Safiullina belän söyläşäbez:

Bezneñ üz matur ğädätlärebez dä bar. Şularnı şähärläşterep, urbanizatsiäläp kertep cibärergä kiräk. Bu mömkin xäl. Xäzerge yäşlärne dä, ub çit ğadätne bäyräm itüçelärne, añlap bula. Alarğa nindider yañalıq kiräk. Yäşlek çorı bit. Läkin, üzebeznekendä matur itep törep kürsätsäk, tatar ğöref-ğadätläre dä yaña şartlarda yäşäp kitär dip uylıym. Bez bu könnärdä diskussiä-oçraşular uzdıra başlıybız. Bu mä’sälä şunda ayırım tikşereler dip uylıym.

Sez “Üzebez” yaña buın xäräkäte koordinatorlarınıñ berse Rezeda Safiullina fikerlären işettegez.

Räfis Cämdixan

XS
SM
MD
LG